Qazaqstannyń erler voleıbol quramasy Japonıada ótken XX Jazǵy Azıa oıyndaryndaǵy sońǵy kezdesýin Indonezıany jeńýmen aıaqtady. 3 qazandaǵy 11-oryn úshin talasta qazaqstandyqtar 3:1 esebimen basym tústi, dep habarlaıdy infohub.kz saıty.
Sergeı Trıkoz shákirtteri birinshi partıada utylyp qalǵanymen, keıingi úsheýinde basymdyq tanytty. Partıalar boıynsha qorytyndy esep — 23:25, 25:23, 25:18, 25:20.
Kezdesýdiń basty keıipkeri shabýylda Vladıslav Mastıhın boldy — ol quramaǵa 19 upaı ákeldi. Azamat Seılhanovtyń enshisinde 15 upaı, Asylhan Izbergenuly 14 upaı jınady.
Azıa oıyndaryndaǵy erler voleıbol týrnıri 1958 jyldan beri ótkizilip keledi. Ony jıirek japondyqtar jeńip alǵan. Qazaqstan quramasy týrnır tarıhynda júldegerler qataryna eshqashan kirmegen. Hanchjoýdaǵy Azıada-2022-de bizdiń komanda 9-oryn alǵan bolatyn.
XX Jazǵy Azıa oıyndary resmı túrde 19 qyrkúıekte ashylyp, 4 qazanda máresine jetedi. 45 eldiń sportshylary qatysatyn jarysta 460 komplekt medal sarapqa salynýda. Azıada-2026-da Qazaqstan quramasynyń quramynda 35 sport túrinen 558 sportshy synǵa túsýde.
Oıyndardyń birinshi kúni qazaqstandyqtar tórt altyn medal jeńip aldy. Oıyndar chempıondary atanǵandar: veloshabandozdar Rınata Sultanova men Alekseı Lýsenko, sondaı-aq karatıster Jolaman Bıgabyl men Sofá Berýlseva. Quramanyń qorjynyna besinshi altyndy MMA saıyskeri Erkinǵalı Búrkitalın, altynshysyn — aralas jekpe-jektegi komandalasy Qadyrbek Shynbaev saldy. 23 qyrkúıekte Lýsenko Azıada-2026-nyń eki dúrkin chempıony atandy. Segizinshi joǵary dárejeli medaldi 24 qyrkúıekte erler arasyndaǵy jup eskekti qaıyq jarysynda Vladıslav Iakovlev pen Ivan Chernýhın jeńip aldy. Toǵyzynshy altyn medaldi 27 qyrkúıekte shpaga sheberlerinen quralǵan komanda oljalady. 2 qazanda altyndy boksshylar Tórehan Sabyrhan men Aıbek Oralbaı, sondaı-aq taekvondoshy Tamırlan Tileýles ıelendi.
Oıyndardyń 13 kúninen keıin Qazaqstan beıresmı medal esebinde segizinshi orynda turdy.