Qazaqstanda 16 jasqa tolmaǵan balalardyń áleýmettik jelilerge kirýin shekteý josparlanyp otyr. Mádenıet jáne aqparat vıse-mınıstri Evgenı Kochetov Táýelsizdik saraıynyń kýlýarlarynda bastamanyń egjeı-tegjeıin aıtyp berdi, dep habarlaıdy infohub.kz saıty.
Jýrnalıser vıse-mınıstrden vedomstvonyń bul másele boıynsha naqty ustanymy bar-joǵyn surady. Evgenı Kochetovtyń aıtýynsha, zań jobasynda qazir eki norma bar. «Qazir zań jobasynda eki norma bar. Birinshisi – materıaldyq norma, ol 16 jasqa tolmaǵan balalarǵa shekteý engiziletinin kórsetedi. Ekinshi norma verıfıkasıaǵa qatysty. Biz verıfıkasıany onlaın-platformanyń ózi júrgizetin tujyrymdy usyndyq», – dedi ol.
Onyń sózinshe, bul norma álemdik tájirıbeni taldaýdan keıin paıda bolǵan. «Álemdik kún tártibin baqylap júrseńiz, kóptegen elder verıfıkasıa mindettemesin ózderine, memleketke alǵanyn bilesiz. Ókinishke qaraı, kóptegen elde bul tájirıbe nátıje bermedi. Aýstralıada bul tolyqqandy júzege aspaǵanyn kórdik, sebebi qujattarǵa qatysty máseleler týyndady. Mysaly, Fransıada osyndaı norma engizilgende joǵarǵy konstıtýsıalyq sot onyń bulaı bolmaýy kerektigin málimdedi. Ol úkimetke qaıtarylyp, prezıdent bul normany jedel qaıta óńdeýdi tapsyrdy. Sondyqtan biz onlaın-platformanyń ózi paıdalanýshylardy verıfıkasıalaý mindettemesin alýy kerek degen qaǵıdatty ustandyq», – dep túsindirdi vıse-mınıstr.
Ol sondaı-aq áleýmettik jelilerde qyzyqty kontent jarıalaǵysy keletin balalarǵa qatysty suraqqa da jaýap berdi. «Ata-analarǵa balalary týraly aıtýǵa eshkim tyıym salmaıdy. Iaǵnı muny ata-ananyń akkaýnty arqyly jasaýǵa bolady. Bul talantty shekteý týraly emes, balalardyń daýysyn azyraq estý týraly emes. Eń aldymen olardy psıhologıalyq áserden, kıberbýllıngten jáne áleýmettik jeliler alyp keletin basqa da qaýipterden qorǵaý týraly. Sondyqtan Qazaqstandaǵy talantty balalardyń sany bul túzetýden kemimeıtinine senimdimiz», – dedi Kochetov.
Eske salaıyq, 2025 jyldyń jeltoqsanynda Qazaqstanda 16 jasqa tolmaǵan balalarǵa áleýmettik jelilerge tyıym salý týraly zań jobasy talqylaýǵa shyǵarylǵany belgili boldy. Osy jyldyń mamyrynda Kochetov túzetý jobasy memlekettik organdarmen kelisý satysynda ekenin, sondyqtan bastamanyń egjeı-tegjeıi áli talqylanyp jatqanyn málimdedi. Jaqynda prezıdent Qasym-Jomart Toqaev ta 16 jasqa tolmaǵan balalardyń áleýmettik jelilerge tirkelýine tyıym salý týraly pikir bildirdi.