Bıyl Qazaqstanda uıymdasqan qylmystyq top múshelerine qatysty 45 qylmystyq is sotqa jetti. Bul týraly infohub.kz saıty habarlaıdy.
İshki ister mınıstrliginiń aqparattyq medıaportaly uıymdasqan qylmystyq toptar (UQT) quramynda jasalǵan eń aýyr qylmystar boıynsha úkimderdi jarıalady.
Máselen, Qaraǵandy oblysynda óńirdegi taý-ken baıytý kásiporyndarynan taýarlyq-materıaldyq qundylyqtardy jymqyrǵan qylmystyq qaýymdastyqtyń uıymdastyrýshysy men 10 múshesine úkim shyǵaryldy. Sot olarǵa 13 jylǵa deıingi merzimge bas bostandyǵynan aıyrý jazasyn taǵaıyndady.
«Sondaı-aq oblystaǵy iri qala quraýshy kásiporyn aýmaǵynan jasyryn alaıaqtyq sqemalardy paıdalanyp, uqsas múlikti jymqyrý faktilerine qatysy bar UQT kóshbasshysy men tórt múshesine aıyptaý úkimi shyǵaryldy. Olarǵa 10 jylǵa deıingi merzimge bas bostandyǵynan aıyrý jazasy taǵaıyndaldy», — dedi vedomstvoda.
Almatyda kólik quraldaryn zańsyz tirkeýge, VIN-kodtar men aqparattyq júıelerdegi derekterdi ózgertýge, sondaı-aq avtomobılderdi satý kezindegi alaıaqtyqqa qatysy bar UQT-nyń 13 múshesi uzaq merzimge — 8 jylǵa deıin bas bostandyǵynan aıyrýǵa sottaldy.
«Qyzylordada júıeli túrde bopsalaýmen aınalysqan, onyń ishinde kásipkerlerge qatysty 8 jergilikti krımınalıtet ókili sottaldy. Tergeý barysynda olarǵa UQT-ny basqarý jáne onyń qyzmetine qatysý aıyptaldy. Sot úkimimen 11 jylǵa deıingi merzimge bas bostandyǵynan aıyrý jazasy taǵaıyndaldy», — dep qosty İİM.
Al astanada esirtki zattaryn ótkizgeni úshin UQT-nyń uıymdastyrýshysy men 5 múshesi sottaldy. Uıymdastyrýshy 17 jylǵa bas bostandyǵynan aıyryldy, onyń sybaılastary 16 jylǵa deıingi merzimge sottaldy.