Qazaqstanda dárilik zattardyń bir bóligi memlekettik baǵa retteýinen shyǵarylǵannan keıin preparattardyń 26,2%-ynyń quny tómendedi. Bul týraly Básekelestikti qorǵaý jáne damytý agenttigi habarlady, dep jazady infohub.kz saıty.
Vedomstvonyń naqtylaýynsha, 2023 jyly 302 reseptsiz preparat retteýden shyǵaryldy, 2024 jyly — 952. 2025 jyly 1 868 pozısıany retteýden shyǵarý tolyǵymen aıaqtaldy.
«2026 jyldyń mamyrynan bastap quny 1 AEK-ten tómen 3 050 reseptilik dárilik zat qosymsha retteýden shyǵaryldy. 2027 jyly komersıalyq segmentte baǵany retteýden shyǵarýdy aıaqtaý josparlanýda. Memlekettik baǵa retteýi tek TMKKK jáne MÁMS aıasyndaǵy dárilik zattar úshin saqtalady», — dedi Básekelestikti qorǵaý jáne damytý agenttiginde.
Dárilerdiń bir bóligi memlekettik baǵa retteýinen shyǵarylǵannan keıin tańbalaý júıesiniń derekteri negizinde baǵalardyń naqty dınamıkasyna monıtorıń júrgizildi. Medısınalyq jáne farmasevtıkalyq baqylaý komıteti 2025 jylǵy 8 tamyzdaǵy jáne 2026 jylǵy shildedegi jaǵdaı boıynsha 2 635 dáriniń satý baǵasyn salystyrdy.
698 dárilik zat boıynsha baǵalar orta eseppen 26,2%-ǵa tómendedi: 456 pozısıa boıynsha — 20%-ǵa deıin, 242 pozısıa boıynsha — 20%-dan astam. 1 142 pozısıa boıynsha baǵalar ózgerissiz qaldy.
795 preparat boıynsha ósim tirkeldi — orta eseppen 29,9%-ǵa, onyń ishinde 646 pozısıa boıynsha — 20%-ǵa deıin, 149 pozısıa boıynsha — 20%-dan astam.
«Monıtorıń nátıjeleri jalpy alǵanda retteýden shyǵarylǵannan keıin baǵanyń aıtarlyqtaı ósýi joq ekenin kórsetedi jáne básekeles ortada baǵany derbes qalyptastyrý múmkindigin rastaıdy. Sonymen qatar baǵa dınamıkasy óńirler boıynsha ártúrli. Baǵa belgileý mehanızmin jetildirý ákimshilik kedergilerdi azaıtýmen jáne dárilik zattar men medısınalyq buıymdardy naryqqa jiberý rásimderin sıfrlandyrýmen qatar júrdi», — dedi vedomstvoda.