Qazaqstanda medısınalyq kómek kórsetý kezinde densaýlyqqa zıan kelgeni úshin pasıentter men olardyń otbasylary 502 mıllıon teńgeden astam ótemaqy aldy. Densaýlyq saqtaý mınıstrliginiń málimetinshe, sońǵy eki jylda osy tetik boıynsha 502,6 mln teńge tólengen, dep habarlaıdy infohub.kz saıty.
Pasıentke saqtandyrý kompanıasynan ótemaqy alýǵa múmkindik beretin júıe 2024 jyldyń qazan aıynan bastap jumys istep keledi. Vedomstvonyń dereginshe, 2026 jylǵy 1 qyrkúıekke deıin 178 296 medısınalyq qyzmetker saqtandyrylǵan: 155 856 adam memlekettik medısınalyq uıymdarda, 22 440 adam jekemenshik uıymdarda eńbek etedi. 2026 jyldyń basynan beri medısınalyq uıymdar 1 867 saqtandyrý shartyn jasasqan, al tólemder 112 jaǵdaıda júrgizilgen.
«Pasıent bul somany medısınalyq qyzmetkerden ózi óndirip alýǵa mindetti emes», — dep atap ótken mınıstrlik habarlamasynda.
Eger pasıent nemese onyń zańdy ókili medısınalyq kómek kórsetý kezinde ómirine nemese densaýlyǵyna zıan keltirildi dep eseptese, ol medısınalyq uıymǵa júginýge quqyly. Jaǵdaıdy táýelsiz saraptama komısıasy qaraıdy.
Onyń quramyna beıindi mamandar, kásibı medısınalyq qaýymdastyqtardyń ókilderi jáne Biryńǵaı saqtandyrý pýlyna qatysýshy saqtandyrý uıymynyń ókilderi kiredi. Qaralyp otyrǵan jaǵdaı oryn alǵan medısınalyq uıymnyń qyzmetkerleri komısıaǵa qosylmaıdy.
Sarapshylar medısınalyq qujattar men kómek kórsetý mán-jaılaryn zertteıdi. Saqtandyrý jaǵdaıy rastalsa, saqtandyrý uıymy pasıentke nemese onyń ókiline zańnamada belgilengen tártippen tólem jasaıdy.
Medısınalyq qyzmetkerlerdi saqtandyrýdy medısınalyq uıym tóleıdi. Saqtandyrý jaǵdaıy týyndaǵan kezde ótemaqyny belgilengen shekterde saqtandyrý kompanıasy jabady. Bul medıkterdi osyndaı somany óz betinshe tóleý qajettiliginen qorǵaıdy.
Buǵan deıin «Kýrsıv» Qazaqstanda sheteldik týrıser úshin mindetti medısınalyq saqtandyrýdy engizgisi keletinin jazǵan bolatyn.