Qazaqstannyń Kardıologıa jáne ishki aýrýlar ǵylymı-zertteý ınstıtýtynda tórt naýqasqa mıtraldi qaqpaqshany rekonstrýksıalaý boıynsha az ınvazıvti ota jasaldy. Bul týraly Densaýlyq saqtaý mınıstrligi habarlady, dep jazady infohub.kz saıty.
Mıtraldi qaqpaqsha sol jaq júrekshe men sol jaq qarynsha arasynda ornalasyp, qandy tek bir baǵytta ótkizedi.
Ota jasalǵandardyń barlyǵy hırýrgıalyq táýekeli joǵary topqa jatty, sondyqtan olarǵa ashyq júrekke klasıkalyq aralasýǵa qarsy kórsetilim boldy.
Otalar mıtraldi qaqpaqshany transkateterlik rekonstrýksıalaýdyń «shetinen-shetine» (TEER) ádisi boıynsha sheberlik sabaǵy aıasynda jasaldy.
TEER ádisin qoldanǵanda dárigerler keýde qýysyn ashpaıdy jáne jasandy qan aınalymyn paıdalanbaıdy. San venasy arqyly júrekke jińishke kateter engiziledi, onyń kómegimen mıtraldi qaqpaqshaǵa arnaıy klıpsa jetkiziledi. Ol qaqpaqshanyń aldyńǵy jáne artqy japyraqshalaryn biriktirip, qannyń keri aǵynyn azaıtady. Buǵan deıin Kardıologıa jáne ishki aýrýlar ǵylymı-zertteý ınstıtýtynda osy tehnologıa boıynsha otalar jasalǵan.
«Otanyń ereksheligi — ol júrektiń últradybystyq zertteýiniń baqylaýymen, kontrast engizbeı jasalady. Óńesh arqyly ÝDZ qoldanyp, biz júrektiń qurylymyn tolyǵyraq qaraımyz. Sondaı-aq mıtraldi qaqpaqshanyń 3D-beınesi qoldanylady, onyń baqylaýymen klıpsa qajetti jerge ornatylady», — dedi Kardıologıa jáne ishki aýrýlar ǵylymı-zertteý ınstıtýtynyń fýnksıonaldyq jáne últradybystyq dıagnostıka bóliminiń meńgerýshisi Aqjan Qonysbekova.
Kardıologıa jáne ishki aýrýlar ǵylymı-zertteý ınstıtýtynyń rentgenendovaskýlárlyq ota blogynyń meńgerýshisi Alekseı Evgenevıchtiń aıtýynsha, mundaı aralasýdan keıin naýqastar tez qalpyna keledi jáne kelesi kúni-aq tósekten tura alady.
Sheberlik sabaǵy aıasynda mamandar mıtraldi qaqpaqshany transkateterlik rekonstrýksıalaýdyń jańa DragonFly júıesin qoldanýdy da talqylady. Qytaı ǵylym akademıasynyń akademıgi, profesor Wang Jian’an ony ázirleý jáne klınıkalyq qoldaný tájirıbesimen bólisti.
Sheteldik sarapshylarmen birge qazaqstandyq kardıologtar prosedýranyń tehnıkalyq erekshelikterin talqylap, aralasýlarǵa naýqastardy iriktedi.