Qazaqstanda 20 tamyzdan bastap uıaly baılanys operatorlaryna qatysty jańa erejeler kúshine enedi. Endi olar abonentterdi tarıfterdiń kóteriletini týraly keminde eki aı buryn habardar etýge mindetti, dep habarlaıdy infohub.kz saıty.
Telearnanyń málimetinshe, ózgerister birneshe aspektini qamtıdy. Atap aıtqanda, operatorlar baǵanyń ósýi týraly habarlamalardy SMS túrinde jiberýge, sondaı-aq qyzmet qunynyń ózgerýi týraly aqparatty óz ınternet-resýrstarynda aldyn ala ornalastyrýǵa mindetti bolady. Bul abonentterge burynǵy operatorda qalý nemese neǵurlym qolaıly jaǵdaılardy izdeý týraly sheshim qabyldaýǵa ýaqyt beredi.
Sonymen qatar, uıaly baılanys operatorlary áleýmettik jáne memlekettik mańyzy bar mobıldi qosymshalarǵa táýlik boıy tegin qoljetimdilikti qamtamasyz etýge mindetteledi. QR Sıfrlyq damý, ınovasıalar jáne aeroǵarysh ónerkásibi mınıstrliginiń telekomýnıkasıalar komıteti baılanys salasyndaǵy memlekettik saıasat basqarmasynyń basshysy Aınur Bısenbaevanyń túsindirýinshe, qazirgi ýaqytta mundaı qosymshalardyń tizbesin aıqyndaıtyn zańǵa táýeldi akt ázirlenýde. Aldyn ala tizbege eGov, eGov Business, eOtinish jáne Aitu qosymshalary enedi.
Sarapshylardyń pikirinshe, tarıftiń kóteriletini týraly aldyn ala habarlaý — qajetti norma. Alaıda baılanys sapasy jıi suraq týǵyzady, sondyqtan básekelestikti damytý mańyzdy, bul tarıfterdi sırek kóterýge múmkindik beredi. «Jańa oıynshylar básekelestik kúresti kúsheıtýge, sapany arttyrýǵa, olardyń qunyn tómendetýge múmkindik beredi. Ekinshi jaǵynan, qoǵamda zamanaýı tehnologıalardan, sol 5G-den qorqý bar, osy turǵyda fobıa bar, sondyqtan memleket tehnologıalardyń qaýip tóndirmeıtinin túsindiretin qurylym retinde áreket ete alady», — dep atap ótti sarapshy Qalılallo Baıtasov.
20 tamyzdan bastap smartfondardy tekserý kúsheıtiledi: satýshylar qurylǵylardy satýǵa deıin verıfıkasıalaýǵa mindetti. Operatormen kelisimshart jasasý abonenttiń bıometrıalyq aýtentıfıkasıasynan keıin ǵana múmkin bolady.