Qazaqstanda 2 qazanda ıadrolyq jáne radıasıalyq oqıǵalarǵa jedel monıtorıń júrgizý jáne den qoıý ortalyǵy jumysyn bastady. Onyń ashylǵany týraly Atom energıasy agenttigi habarlady, dep jazady infohub.kz saıty.
Ortalyq Qazaqstan men Amerıka Qurama Shtattarynyń yntymaqtastyǵynyń nátıjesinde, AQSh Energetıka mınıstrliginiń Iadrolyq qaýipsizdik jónindegi ulttyq ákimshiliginiń (DOE/NNSA) qoldaýymen quryldy. Ashylý saltanatyna Atom energıasy agenttiginiń, AQSh elshiliginiń jáne DOE/NNSA ókilderi qatysty.
Jańa qurylymnyń negizgi mindetteri — radıasıalyq jaǵdaıdy baqylaý jáne taldaý, aqparatty jedel almasý men ıadrolyq jáne radıasıalyq oqıǵalar kezindegi is-qımyldardy úılestirý.
Agenttikte atap ótkendeı, ortalyqtyń jumysy jedel ári negizdelgen sheshimder qabyldaý úshin naqty derekterdi ýaqtyly alýdy qamtamasyz etýi tıis. Sonymen qatar ortalyq ulttyq ıadrolyq jáne radıasıalyq qaýipsizdik júıesiniń yqtımal oqıǵalarǵa daıyndyǵyn arttyryp, memlekettik organdar men beıindi uıymdardyń ózara is-qımylyn jolǵa qoıýǵa kómektesedi dep kútilýde.
Bolashaqta ortalyqtyń tehnıkalyq jáne taldamalyq múmkindikterin damytý, vedomstvoaralyq ózara is-qımyldy jetildirý, mamandar daıarlap, olardyń biliktiligin arttyrý, sondaı-aq praktıkalyq jattyǵýlar ótkizý josparlanýda.
Buǵan deıin «Kýrsıv» jazǵandaı, Nú-Delıdegi «BRIKS plús» samıtinde Qazaqstan Prezıdenti Qasym-Jomart Toqaev ıadrolyq derjavalardy jańa tehnologıalarǵa baılanysty táýekelderdi azaıtý úshin joǵary deńgeıdegi dıalogty qaıta bastaýǵa shaqyrdy. Prezıdent uzaqqa sozylǵan qaqtyǵystar men halyqaralyq qaýipsizdik júıesiniń álsireýi jańa qarý jarysy men strategıalyq qatelikter qaýpin arttyratynyn eskertti.