Qazaqstandyq júrgizýshiler jol boıyndaǵy dárethanalardan dárethana qaǵazy men sabyndy jappaı urlap, dárethanalardy búldirip jatqany anyqtaldy. Vandalızmmen kúresý úshin demalys aımaqtaryna beınebaqylaý kameralary ornatylyp, turaqty patrúldeý uıymdastyrylady, dep habarlaıdy infohub.kz saıty.
«QazAvtoJol» ulttyq kompanıasynyń málimetinshe, qazirgi ýaqytta respýblıkalyq avtomobıl joldarynyń boıynda 1 114 sanıtarlyq-gıgıenalyq torap ornatylǵan, onyń 180-i jyly, 934-i sýyq. 2026 jyldyń sońyna deıin taǵy 13 jyly sanıtarlyq torap ornatý josparlanýda. Jańa nysandar qozǵalys qarqyndylyǵy, jol ýchaskeleriniń erekshelikteri jáne paıdalanýshylardyń naqty qajettilikteri eskerile otyryp ornalastyrylady.
Sonymen qatar, respýblıkalyq trassalar boıynda 1 443 jol boıy qyzmet kórsetý nysany ornalasqan — janarmaı quıý stansıalary, tamaqtaný pýnktteri, kempıngter, turýǵa arnalǵan nysandar jáne basqa da qyzmet kórsetý nysandary. Olardyń quramynda sanıtarlyq toraptar da bar, dep naqtylady «QazAvtoJolda».
Jol boıyndaǵy dárethanalardyń jaı-kúıine «QAJservıs» JSHS qyzmetkerleri, sondaı-aq jol boıy qyzmet kórsetý nysandarynyń menshik ıeleri men jalǵa alýshylar jaýapty. Kompanıada 2025 jyly jol boıyndaǵy dárethanalardyń jaı-kúıine qatysty 224 ótinish pen shaǵym túskenin, al 2026 jyly — 186 ekenin qosty.
Másele týraly 1403 baılanys ortalyǵy, WhatsApp jáne Telegram arqyly habarlaýǵa bolady. Sanıtarlyq nysandarda ótinish jiberýge arnalǵan QR-kodtar da ornalastyrylǵan.
Buǵan deıin «Kýrsıv» «QazAvtoJol» júrgizýshilerden dárethananyń artyna dárethanaǵa barmaýdy suraǵanyn jazǵan bolatyn.