Ekologıa mınıstri jańa buıryqqa qol qoıdy, oǵan sáıkes qazaqstandyqtar bas tartqysy keletin úı janýaryna jańa ıe izdeýge mindetteledi, dep habarlaıdy infohub.kz saıty.
Normatıvtik quqyqtyq aktilerdiń etalondyq baqylaý bankinde ekologıa, geologıa jáne tabıǵı resýrstar mınıstriniń 2022 jylǵy 20 mamyrdaǵy «Úı janýarlaryn ustaý jáne serýendetýdiń úlgilik qaǵıdalaryn bekitý týraly» buıryǵyna ózgerister engizetin buıryǵy jarıalandy.
Jańashyldyqtar úı janýarynan bas tartatyn qazaqstandyqtar oǵan jańa ıe tabýy kerektigin retteıdi. «Úı janýaryn odan ári ustaý múmkin bolmaǵan jaǵdaıda, úı janýarynyń ıesi jáne (nemese) jaýapty tulǵa úı janýaryn odan ári ornalastyrý sharalaryn qabyldaıdy, onyń ishinde ony janýarlarǵa arnalǵan panalaıtyn orynǵa, janýarlardy ýaqytsha ustaý pýnktine ne ony ustaý úshin qajetti jaǵdaılar jasaı alatyn jeke nemese zańdy tulǵalarǵa berý arqyly. Úı janýaryn janýarlardy ýaqytsha ustaý pýnktine berý kezinde úı janýarynyń ıesi nemese jaýapty tulǵa janýardyń zańdy taǵdyry anyqtalǵanǵa deıin ony ustaýdy qamtamasyz etedi», — delingen buıryqta.
Sondaı-aq buıryqta janýardan bas tartý ıesiniń úı janýaryna jaýapkershiliginiń toqtatylýyn bildirmeıtini kórsetilgen. «Janýardan bas tartý úı janýarynyń ıesiniń nemese jaýapty tulǵanyń úı janýaryna qatysty mindetteriniń toqtatylýyna ákep soqpaıdy, oǵan menshik quqyǵy basqa tulǵaǵa ótkenge deıin, úı janýary janýarlarǵa arnalǵan panalaıtyn orynǵa berilgenge deıin nemese ony janýarlardy ýaqytsha ustaý pýnktine berý kezinde janýardyń zańdy taǵdyry anyqtalǵanǵa deıin», — delingen qujatta.
Buıryq ol alǵash ret resmı jarıalanǵan kúnnen keıin on kúntizbelik kún ótken soń qoldanysqa engiziledi.