Áleýmettik jelilerde qazaqstandyqtar koronavırýsqa uqsas belgiler – tamaq aýrýy, jótel, ıis pen dám sezý qabiletiniń joǵalýy týraly jıi habarlaı bastady. Alaıda dárigerler ózdiginen dıagnoz qoıýǵa bolmaıtynyn eskertedi, dep habarlaıdy infohub.kz.
Densaýlyq saqtaý mınıstrliginiń málimetinshe, qazir elimizde birneshe respıratorlyq vırýs taralýda, biraq syrqattanýshylyqtyń ósýi baıqalmaıdy. Mamandar aǵymdaǵy jaǵdaıdy maýsymdyq dep sıpattaıdy.
«Qazirgi ýaqytta halyq arasynda vırýstyq ınfeksıalardyń ósýi joq. Biz fondyq nemese maýsymdyq syrqattanýshylyqty baıqap otyrmyz, al bizdiń zerthanalar anyqtaǵan vırýstardyń ishinde erekshe vırýstar joq», – dedi Densaýlyq saqtaý mınıstrliginiń Qoǵamdyq densaýlyq saqtaý ulttyq ortalyǵy fılıalynyń dırektory Aınagúl Qýatbaeva.
Zerthanalyq zertteýler naýqastar arasynda rınovırýs, adenovırýs, paragrıpp jáne maýsymdyq koronavırýstar kezdesetinin kórsetedi. Sondaı-aq COVID-19 jaǵdaılary anyqtalýda, alaıda jańa qaýipti shtammnyń paıda bolý belgileri tirkelgen joq.
Mamandar tipti qarapaıym JRVI bir jasqa deıingi balalarda, júkti áıelderde, egde jastaǵy adamdarda jáne sozylmaly aýrýlary bar naýqastarda aýyr ótýi múmkin ekenin eske salady. Belgiler paıda bolǵan kezde ózdiginen dıagnoz qoıýdyń qajeti joq, dárigerge júgingen jón.