Sońǵy kezderi qazaqstandyqtar koronavırýs ınfeksıasyn eske túsiretin sımptomdarmen jıi shaǵymdana bastady. El turǵyndary áleýmettik jelilerde tamaq aýrýy, jótel, sondaı-aq dám men ıistiń joǵalýy týraly aıtyp jatyr. Alaıda Densaýlyq saqtaý mınıstrligi úreılenbeýge jáne óz betinshe dıagnoz qoıýǵa bolmaıtynyn eskertedi, dep habarlaıdy infohub.kz saıty.
Telearnanyń málimetinshe, qazirgi ýaqytta Qazaqstanda rınovırýs, adenovırýs, paragrıpp jáne COVID-19 qosa alǵanda, maýsymdyq koronavırýstar taralýda. Dárigerler jańa qaýipti shtammnyń paıda bolý belgileri ázirge tirkelmegenin aıtady. Sonymen qatar mamandar bir jasqa deıingi balalarda, júkti áıelderde, egde jastaǵy adamdarda jáne sozylmaly aýrýlary bar naýqastarda qarapaıym JRVI da aýyr túrde ótýi múmkin ekenin eske salady.
«Qazirgi ýaqytta halyq arasynda vırýstyq ınfeksıalardyń ósýi joq. Biz fondyq nemese maýsymdyq aǵymdaǵy syrqattanýshylyqty baıqap otyrmyz, al zerthanalarymyz anyqtaǵan vırýstardyń ishinde erekshe vırýstar joq», — dep túsindirdi Densaýlyq saqtaý mınıstrliginiń Qoǵamdyq densaýlyq saqtaý ulttyq ortalyǵy fılıalynyń dırektory Aınagúl Qýatbaeva.