Qazaqstanda júrgizýshiler endi aqyly joldarda toqtamaı-aq jol aqysyn tóleı alady. Ol úshin avtokólikke tegin RFID-metka ornatý qajet, dep habarlaıdy infohub.kz saıty.
«KazAvtoJol» baspasóz qyzmetiniń málimetinshe, respýblıkalyq mańyzy bar aqyly avtokólik joldarynyń paıdalanýshylary jol aqysyn avtomatty túrde tóleý úshin RFID-metkalardy paıdalana alady. Bul tehnologıa aqy tóleý pýnktterinen ótý ýaqytyn qysqartyp, kezekti azaıtýǵa múmkindik beredi.
«RFID-metka avtokólikke ornatylyp, onyń memlekettik tirkeý nómirine jáne paıdalanýshynyń jeke shotyna baılanystyrylady. Joldan ótken kezde júıe kólikti avtomatty túrde tanyp, toqtaýdyń qajeti joq, balanstan aqshany esepten shyǵarady», — dep túsindirdi kompanıada.
RFID-metkalar tegin beriletini atap ótildi. Olardy respýblıkalyq joldardyń aqyly ýchaskelerindegi tólem pýnktterinen alyp, ornatýǵa bolady. Qyzmetkerler qurylǵyny avtokólikke baılanystyrýǵa kómektesedi.
«Metkalardy paıdalaný tólem pýnktteriniń ótkizý qabiletin arttyryp, ásirese qozǵalys qarqyndy kezeńderde jol júrýdi yńǵaıly etedi. Kompanıa tegin metkany aldyn ala alyp, jeke shottaǵy balansty oń ustap turýdy usynady, sonda jol aqysy avtomatty túrde jáne toqtaýsyz tólenedi», — dep qosty «KazAvtoJol» ókilderi.
RFID-metkalardy alý jáne paıdalaný máseleleri boıynsha qazaqstandyqtardy «KazAvtoJol» koll-ortalyǵyna 1403 nómiri boıynsha habarlasýyn suraıdy.