«QazAvtoJol» ulttyq kompanıasy júrgizýshilerge erekshe ótinishpen shyqty — tabıǵı qajettilikterin óteý úshin tek sanıtarlyq toraptardy paıdalanýdy suraıdy, dep habarlaıdy infohub.kz saıty.
Kompanıanyń baspasóz qyzmeti respýblıkalyq avtomobıl joldarynyń boıynda jylytylatyn jáne sýyq dárethanalar jumys isteıtinin eske saldy. Olar árbir saıahatshynyń taza ári yńǵaıly dárethanany paıdalana alýy úshin arnalǵan. Alaıda keıbir nysandarda adamdar kezek kútkisi kelmeı, dárethana ǵımaratynyń artyna baryp jatqan jaǵdaılar tirkeledi. Bul aýmaqtyń lastanýyna, jaǵymsyz ıistiń, qoqystyń paıda bolýyna jáne antısanıtarıaǵa ákeledi.
«QazAvtoJol» júrgizýshilerdi aınalasyndaǵylarǵa qurmet kórsetýge jáne mádenıet pen gıgıenanyń qarapaıym erejelerin saqtaýǵa shaqyrdy. Atap aıtqanda, sál kútýge týra kelse de, sanıtarlyq toraptardy paıdalaný, aýmaqta qoqys pen dárethana qaǵazyn qaldyrmaý, ortaq paıdalanýǵa arnalǵan múlikti qorǵaý jáne kún saıyn tazalyqty saqtaıtyn qyzmetkerlerdiń eńbegin qurmetteý usynylady.