Қар жауып, көктайғақ пен аяз күшейген сайын Қазақстан жолдарындағы қауіп те арта түседі. «КазАвтоЖол» АҚ мамандары жүргізушілерге қыс түспес бұрын көлікте нені тексеру қажет екенін еске салды, деп хабарлайды infohub.kz сайты.
Ұлттық компания автокөлік иелерін көлікті қысқы маусымға алдын ала дайындауға шақырды. Жүргізушілерге қар басқан, мұздаған жолдардағы қауіпті азайту үшін көліктің техникалық жағдайын тексеру ұсынылады.
Ең алдымен қысқы шина орнатып, протектор тереңдігі мен қысымның талапқа сай екеніне көз жеткізу керек. Сондай-ақ аккумулятор мен зарядтау жүйесін тексеру маңызды: аязда батарея қуаты төмендеуі мүмкін.
Техникалық сұйықтықтарға ерекше назар аударған жөн. Мотор майы, әйнек жуғыш сұйықтығы және салқындатқыш сұйықтық төмен температурада жұмыс істеуге жарамды болуы тиіс. Сонымен қатар төтенше жағдайға дайын болу қажет, деп атап өтті компанияда: көлікте сүйреу арқаны, қозғалтқышты іске қосатын сымдар, дәрі қобдишасы, шам және жылы киім болғаны дұрыс.
«Сонымен қатар жүргізушілерге жолға шығар алдында ауа райы болжамын және жол жағдайы туралы ақпаратты тексеру ұсынылады. Республикалық автожолдардағы ахуал туралы өзекті ақпаратты «КазАвтоЖол» ұлттық компаниясының ресми сайты мен әлеуметтік желілердегі парақшаларынан, сондай-ақ 1403 байланыс орталығының нөмірі арқылы білуге болады. Қыс мезгілінде жылдамдық режимін сақтау, қауіпсіз қашықтықты ұстау және күрт маневрлерден аулақ болу ерекше маңызды», — деді компанияда.