Ulttyq kompanıa «QazAvtoJol» qazaqstandyq júrgizýshilerge jazǵy kezeńde aýyr júk kólikterine qatysty maýsymdyq shekteýlerdi eske saldy. Kompanıanyń baspasóz qyzmetiniń habarlaýynsha, ýaqytsha sharalar respýblıkalyq mańyzy bar avtomobıl joldarynda qoldanylyp, 25 gradýstan joǵary aýa temperatýrasynda bir oske túsetin júktemesi 8 tonnadan asatyn kólik quraldaryna qatysty engizilgen, dep habarlaıdy infohub.kz.
«Shekteýler bir oske túsetin júktemesi 8 tonnadan asatyn avtokólik quraldaryna qatysty jáne 25 gradýstan joǵary aýa temperatýrasynda ár aımaq úshin belgilengen saǵattarda ǵana qoldanylady. Iaǵnı, bul júk kólikteriniń qozǵalysyna tolyq tyıym salý emes, aýyr júk kólikteriniń júrýin maýsymdyq retteý», — dep atap ótti kompanıada.
Bul shara joǵary temperatýra kezinde jol tósemin saqtaýǵa baǵyttalǵan. Ystyq áserinen asfáltbeton qyzyp, júktemege sezimtal bolady, bul koleılik, tolqyndyq jáne basqa merziminen buryn deformasıalardyń paıda bolýyna ákelýi múmkin.
25 gradýstan joǵary temperatýrada saǵat 11:00-den 21:00-ge deıin shekteýler 15 tamyzǵa deıin Abaı, Aqmola, Aqtóbe, Shyǵys Qazaqstan, Batys Qazaqstan, Qaraǵandy, Qostanaı, Pavlodar jáne Soltústik Qazaqstan oblystarynda qoldanylady. Al 31 tamyzǵa deıin saǵat 10:00-den 22:00-ge deıin sol temperatýralyq jaǵdaıda — Almaty, Atyraý, Jambyl, Qyzylorda, Mańǵystaý, Túrkistan, Jetisý jáne Ulytaý oblystarynda.
Kórsetilgen ýaqyttan tys jáne 25 gradýs jáne odan tómen temperatýrada kólik qozǵalysy ruqsat etilgen salmaq pen ólshem parametrleri saqtalǵan jaǵdaıda ádettegi tártippen júzege asyrylady. A-1 Astana — Petropavl avtojolynyń Kókshetaý arqyly ótetin 68-196 km ýchaskesinde sheben-mastıkaly asfáltbeton jamylǵysy bar: 25 gradýstan joǵary temperatýrada oske túsetin júktemesi 9 tonnadan asatyn kólikterdiń júrýi shekteledi.
Sondaı-aq normatıvtik talaptar qosarlanǵan, úshtaǵan jáne basqa ós toptary úshin shekti kórsetkishterdi belgileıdi. Maýsymdyq shekteýler kezeńinde kólik quralynyń ruqsat etilgen jalpy massasy belgilengen parametrlerden 20%-ǵa tómendeıdi. Jazǵy shekteýler halyqaralyq tasymaldardy júzege asyratyn, tótenshe jaǵdaılardy joıýǵa tartylǵan, tez buzylatyn ónimderdi, jolaýshylardy, qaýipti júkterdi tasymaldaıtyn kólikterge, sondaı-aq áskerı jáne gýmanıtarlyq tasymaldarǵa qoldanylmaıdy.