2025 jyldyń qorytyndysy boıynsha fosforıt kenin óndirýmen jáne tyńaıtqysh shyǵarýmen aınalysatyn «Kazfosfat» kompanıasynyń shyǵyny 14,65 mlrd teńgeni qurady. Kompanıa ıeleriniń qatarynda reseılikter, mıllıarder Vladımır Kım jáne májilis eks-spıkeri Nurlan Nıgmatýllınniń uldary bar, dep habarlaıdy infohub.kz saıty.
2025 jylǵy esepke sáıkes, kompanıa shyǵyny ótken jylmen salystyrǵanda eki eseden astamǵa qysqarǵan: 2024 jyly ol 33,2 mlrd teńgeni quraǵan.
Sonymen qatar, satyp alýshylarmen jasalǵan kelisimsharttar boıynsha kompanıanyń túsimi 80%-ǵa ósip, 217,9 mlrd teńgege jetti. Ónimniń ózindik quny da 67%-ǵa artyp, 159,8 mlrd teńgeni qurady.
Kompanıa túsiminiń negizgi bóligin amofos – azot-fosfor tyńaıtqyshyn satý ákeledi. Ony ótkizýden túsken tabys 84%-ǵa ósip, 190 mlrd teńgege jetti. Taǵy 24 mlrd teńgeni usaqtalǵan kendi satý ákeldi. Ózindik qunnyń ósýine eń kóp áser etken – shıkizat pen materıaldar qunynyń 33%-ǵa (80 mlrd teńgege) artýy, sondaı-aq jalaqy shyǵyndarynyń 77%-ǵa (17 mlrd teńgege) ósýi.
Kompanıanyń ótkizý jáne tasymaldaý shyǵyndary aıtarlyqtaı – 40%-ǵa ósip, 23,9 mlrd teńgege jetti, al jalpy ákimshilik shyǵyndar azaıyp, 14,3 mlrd teńgeni qurady.
Nátıjesinde «Kazfosfattyń» operasıalyq paıdasy 11,6 mlrd teńge boldy, alaıda ony qarjylandyrý shyǵyndary – 14,6 mlrd teńge, sondaı-aq baǵamdyq aıyrmadan bolǵan 5 mlrd teńge kólemindegi eleýli shyǵyn «jep qoıdy». Bir jyl buryn kompanıa baǵamdyq aıyrmadan paıda kórgen edi.
Sonymen qatar, kompanıanyń tabys salyǵy boıynsha shyǵyndary 6 mlrd teńgeni qurady. Ótken jyly operasıalyq shyǵynǵa baılanysty kompanıa salyqtan 5 mlrd teńge únemdegen.
2025 jyldyń sońyna qaraı Halyk Bank, «Qazaqmys» jáne ártúrli baılanysty taraptar tarapynan kompanıaǵa berilgen jalpy qaryz somasy 156 mlrd teńgeni qurady.
«Kazfosfat» fosforıt kenin óndiredi jáne óńdeıdi, mıneraldy tyńaıtqyshtar shyǵarady. Kompanıa Jambyl oblysyndaǵy Sholaqtaý, Aqsaı, Kóksý, Kıstas, Jańatas ken oryndaryn ıgerýde. Ol Tarazdaǵy mıneraldy tyńaıtqyshtar zaýytyna jáne Stepnogorskidegi hımıa zaýytyna ıelik etedi.
«Kazfosfat» kompanıasy MFSA-da tirkelgen CAF Holding-ke tıesili. Onyń ıeleri, óz kezeginde, KP Fertilizers Ltd. (MFSA) – 50%, Kazakhmys Resources B.V. – 40%, sondaı-aq májilis eks-spıkeri Nurlan Nıgmatýllınniń uldary Nurlanuly Nurhan – 5% jáne Nurlanuly Nurjan – 5%.
Golandıalyq Kazakhmys Resources B.V. kompanıasy, shamasy, baılyǵy $5,9 mlrd dep baǵalanatyn mıllıarder Vladımır Kımmen baılanysty. Buryn ol onyń ıesi retinde tirkelgen.
KP Fertilizers Ltd. «Qazhımprom Holdıńke» tıesili. Onyń ıeleri – «Ýralhımniń» burynǵy top-menedjerleri, reseılikter Evgenı Shavel (úlesi 33,34%), Mıhaıl Genkın (33,33%) jáne Sergeı Momselıdze (33,33%).
Buǵan deıin Vladımır Kımge tıesili Kazakhmys Copper kompanıasy Bank RBK-ge kepildik retinde osy banktegi shottarynda $250 mln usynatyny habarlanǵan. Kepildik Vladımır Kım de ortaq ıesi bolyp tabylatyn fosfor kompanıalarynyń qaryzdary boıynsha engiziledi.