28 shildede Qazaqstannyń bes qalasynda qolaısyz meteojaǵdaılar kútiledi, bul atmosferada zıandy zattardyń jınalýyna ákeledi. Aýa sapasynyń nasharlaý qaýpi Almaty, Aqtóbe, Balqash, sondaı-aq túngi ýaqytta Astana men Qostanaı qalalarynda tónip tur, dep habarlaıdy infohub.kz saıty.
Sınoptıkterdiń málimetinshe, atalǵan eldi mekenderde zıandy qospalardyń jerge jaqyn aýa qabatynda ustalýyna jaǵdaı týady. Qolaısyz meteojaǵdaılar (QMJ) tymyq aýa raıy, álsiz jel, tuman jáne temperatýralyq ınversıanyń saldarynan paıda bolady, bul ekologıalyq ahýaldyń nasharlaýyna sebep bolady.
Mamandardyń eskertýinshe, QMJ kezeńinde lastanǵan aýanyń densaýlyqqa keri áser etý qaýpi artady, ásirese tynys alý jáne júrek-qan tamyrlary júıesiniń sozylmaly aýrýlary bar adamdar úshin. Lastaný deńgeıine jel jyldamdyǵy, ylǵaldylyq, aýa temperatýrasy jáne jaýyn-shashynnyń bolýy da áser etedi.
Turǵyndarǵa kóshede, ásirese qarbalas joldar men shyǵaryndy kózderiniń mańynda bolý ýaqytyn qysqartý usynylady. Balalarǵa, qart adamdarǵa jáne júkti áıelderge uzaq serýenderden bas tartqan jón. Tynys alý jáne júrek aýrýlary bar adamdar men alergıalyq aýrýlarǵa shaldyqqandar qajetti dári-dármekterin ózderimen alyp júrýi kerek. QMJ kúnderi ashyq aýada qarqyndy dene jattyǵýlaryn shekteý jáne jattyǵýlardy jabyq úı-jaılarǵa aýystyrǵan jón.
Buǵan deıin Kazgıdromettiń boljamy boıynsha 28 shildede Qazaqstanda aýa raıy qarama-qaıshy bolatyny habarlanǵan bolatyn: keıbir óńirlerdi burshaq aralas nóser men qatty jel, al basqalaryn – ekstremaldy ystyq, mysaly, Mańǵystaý oblysynda aýa +47 gradýsqa deıin qyzady.