Jańaózende kúıik bólimshesin ashýǵa bólingen demeýshilik qarajatty jymqyrý sqemasy áshkerelendi. Qazaqstan Respýblıkasynyń Qarjylyq monıtorıń agenttiginiń qyzmetkerleri anyqtaǵandaı, medısınalyq jabdyqqa aýdarylǵan 223 mln teńgeniń tek 92 mln teńgesi ǵana maqsatyna jumsalǵan, al aýrýhana keshendi jabdyqtaýdyń ornyna eki kúıikke qarsy tósek alǵan, dep habarlaıdy infohub.kz saıty.
İs materıaldaryna sáıkes, 2025 jyly Mańǵystaý oblysynyń Densaýlyq saqtaý basqarmasy «QazMunaıGaz» UK AQ-ǵa kúıik bólimshesin ashýǵa demeýshilik kómek kórsetý týraly ótinish bildirgen. Osydan keıin «OzenMunaıGaz» AQ «Jarylqaý» qoǵamdyq qoryna 223 mln teńge aýdarǵan.
Bastapqyda joba segiz túrli medısınalyq jabdyqty satyp alýdy jáne qyzmetkerlerdi oqytýdy kózdegen. Alaıda keıin sharttar ózgertilip, bólimsheni keshendi jabdyqtaýdyń ornyna qoǵamdyq qor, qalalyq aýrýhana jáne «AKBS Invest» JSHS arasynda tek eki kúıikke qarsy tósek satyp alýǵa úshjaqty shart jasalǵan.
«Bul rette satyp alý osyndaı quny bar medısınalyq tehnıkany Biryńǵaı dıstrıbútor arqyly alýdy kózdeıtin zańnama talaptaryn aınalyp ótip júrgizilgen», — dep naqtylady Qarjylyq monıtorıń agenttiginde.
Tergeý derekteri boıynsha, zańsyz sqemaǵa qalalyq aýrýhana dırektorynyń orynbasary, «Jarylqaý» qoǵamdyq qorynyń jetekshisi, jetkizýshi, sondaı-aq Jańaózen ákiminiń burynǵy orynbasary qatysqan.
Nátıjesinde jabdyq satyp alýǵa tek 92 mln teńge jumsalǵan. Qalǵan soma úlestes kásiporyndar arqyly qolma-qol aqshaǵa aınaldyrylyp, qatysýshylar arasynda bólingen.
«AKBS Invest» JSHS ókili qylmystyq jolmen tapqan kiriske astanadan páter satyp alyp, ony úshinshi tulǵalarǵa rásimdegen», — dep qosty QMA-da.
Úsh kúdikti qamaýǵa alyndy. Jańaózen ákiminiń eks-orynbasaryna qatysty laýazymdyq ókilettigin asyra paıdalaný faktisi boıynsha tergeý bastaldy. Sqemaǵa qatysýshylardyń múlkine, onyń ishinde 3 páter, 2 turǵyn úı jáne bir avtokólikke tyıym salyndy.
Tergeý jalǵasýda.
Buǵan deıin «Kýrsıv» Qarjylyq monıtorıń agenttigi mindetti áleýmettik medısınalyq saqtandyrý salasyndaǵy alaıaqtyq faktileri boıynsha 36 qylmystyq isti tergep jatqanyn jazǵan.