Ál-Farabı atyndaǵy Qazaq ulttyq ýnıversıtetiniń basqarma tóraǵasy – rektory Janseıit Túımebaev jańa oqý jylynyń bastalýyna oraı stýdenttermen kezdesti, dep habarlaıdy infohub.kz saıty.
Kezdesýde Memleket basshysy Qasym-Jomart Toqaevtyń jasandy ıntellektini damytý, sıfrlyq tehnologıalardy keńinen engizý jáne Qazaqstandy zamanaýı sıfrlyq memleketke aınaldyrý jónindegi tapsyrmalaryna sáıkes atqarylǵan jumystardyń nátıjeleri tanystyryldy. Rektor ýnıversıtettiń aldaǵy josparlary týraly da aıtyp, prezıdenttiń joldaýynda belgilengen, jastardy qoldaýǵa jáne damytýǵa baǵyttalǵan tapsyrmalardyń iske asyrylýy jóninde aqparat berdi.
İs-sharaǵa birinshi kýrs stýdentteri, «Altyn belgi» belgisiniń ıegerleri, halyqaralyq olımpıadalar men jarystardyń jeńimpazdary, sondaı-aq oqý ornynyń qoǵamdyq ómirine belsene qatysatyn jastar qatysty. Búginde Ál-Farabı atyndaǵy Qazaq ulttyq ýnıversıtetinde 30 myńǵa jýyq stýdent bilim alady. Jańa 2026-2027 oqý jylynda ýnıversıtet stýdentteriniń qataryn 8117 birinshi kýrs stýdenti tolyqtyrdy, olardyń ishinde 674 «Altyn belgi» belgisiniń ıegeri men respýblıkalyq jáne halyqaralyq jarystardyń jeńimpazy bar.
Joǵary oqý ornynyń basshysy stýdentterdi jańa oqý jylynyń bastalýymen quttyqtady. Janseıit Túımebaev óz sózinde qazirgi kezeńde joǵary bilim júıesiniń aldynda jańa mindetter turǵanyn atap ótti.
«Biz úshin eń basty qundylyq – stýdent. Sondyqtan sıfrlyq transformasıa eń aldymen jastardyń sapaly bilim alýyna, ǵylymı izdenisine jáne kásibı damýyna yqpal etýi tıis. QazUÝ stýdentteri elimizdiń sıfrlyq ekonomıkasyn qalyptastyratyn mamandardyń jańa býyny bolýy kerek», – dedi rektor.
Kezdesý barysynda jastardyń azamattyq jaýapkershiligi men qoǵamdyq mádenıeti máselelerine erekshe nazar aýdaryldy. Rektor zań men tártipti saqtaý, qoǵamdyq ortada etıkalyq normalardy ustaný, úlkendi syılaý jáne kishige qamqorlyq jasaý árbir stýdenttiń kúndelikti ómiriniń ajyramas bóligine aınalýy kerektigin atap ótti.
Sonymen qatar ýnıversıtet basshysy stýdentterdi salaýatty ómir saltyn ustanýǵa, durys tamaqtanýǵa, sportpen turaqty shuǵyldanýǵa jáne zıandy ádetterden bas tartýǵa shaqyrdy. Ýnıversıtet aýmaǵynyń tazalyǵyn saqtaý men jasyl jelekterge uqypty qaraý da árbir jastyń ortaq jaýapkershiligi ekeni aıtyldy.
Oqý mádenıetin qalyptastyrýǵa jáne jastardyń zıatkerlik deńgeıin arttyrýǵa erekshe kóńil bólindi. Janseıit Túımebaev Memleket basshysy usynǵan otandyq ádebıettiń úzdik týyndylaryn oqýdyń mańyzdylyǵyn atap, stýdentterdiń kitap oqýǵa degen qyzyǵýshylyǵyn arttyrý qajettigin aıtty.
Kezdesý sońynda Janseıit Túımebaev stýdentterdiń jańa ıdeıalary men bastamalary ýnıversıtettiń damýynda mańyzdy ról atqaratynyn atap ótip, jastardy ǵylymnyń, ınovasıalardyń jáne elimizdiń sıfrlyq transformasıasynyń damýyna belsene úles qosýǵa shaqyrdy.