Memlekettik munaı qubyry kompanıasy «KazTransOıl» basqarma músheleriniń 2025 jylǵy jıyntyq syıaqysy 405 mln teńgeni quraǵanyn infohub.kz saıty habarlaıdy.
Qazaqstan qor bırjasynda (KASE) jarıalanǵan eseptilikke sáıkes, kompanıanyń atqarýshy organyna tólengen jalpy soma aldyńǵy jylmen salystyrǵanda tómendegen — bul kórsetkish 484 mln teńge bolǵan edi.
Esepti kezeńniń basym bóliginde basqarma quramyna jeti adam kirdi. Jyl boıy bas dırektor Arman Qasenov, Ámirjan Ospanov, Jaıdarman Isaqov, Ǵazız Qoshanov jáne Almas Úńgirsynov jumys istedi. Qańtar aıynda olarǵa Abaı Beısembaev qosyldy, al sáýirde kadrlyq ózgerister boldy: óndiris jónindegi bas dırektordyń orynbasary laýazymyna Temirhan Ábdirovtiń ornyna Nurjan Qushjanov taǵaıyndaldy.
Sonymen qatar, kompanıa 2026 jyldyń birinshi jartyjyldyǵyndaǵy qarjylyq kórsetkishterin jarıa etti. «KazTransOıl» konsolıdasıalanǵan taza paıdasy osy kezeńde 29 mlrd teńgeni qurap, ótken jyldyń sáıkes kezeńimen salystyrǵanda 33,4%-ǵa ósken. Kiris 10,28%-ǵa artyp, 180 mlrd teńgeni qurady.
«KazTransOıl» jalpy uzyndyǵy 5,3 myń shaqyrymdy quraıtyn magıstraldyq munaı qubyrlary jelisin jáne 2,3 myń shaqyrym sý qubyrlaryn paıdalanady. Kompanıanyń baqylaý paketi (90% plús bir jaı aksıa) «Samuryq-Qazyna» qorynyń enshiles qurylymy «QazMunaıGazǵa» tıesili, qalǵan 10% mınorıtarlyq aksıonerlerde.
Buǵan deıin «KazTransOıl» 2025 jylǵy paıdasynan dıvıdendter tóleýge 45,39 mlrd teńge jumsaıtyny habarlanǵan bolatyn. Sol jylǵy paıda 56,6 mlrd teńgeni quraǵan.