Kenıanyń ortalyǵyndaǵy Sambýrý okrýginde ornalasqan Ololokve taýynda tikushaq apatqa ushyrap, bortyndaǵy alty adamnyń barlyǵy qaza tapty. Bul týraly áýe apattaryn tergeý qyzmetiniń ókilderi BBC-ge habarlady.
Áýe apattaryn tergeý departamenti qaza tapqandardyń jeke basy áli anyqtalmaǵanyn málimdedi. Jergilikti BAQ derekterine súıensek, tikushaqta týrıser bolǵan.
Kenıa azamattyq avıasıa ákimshiligi (KCAA) apat jergilikti ýaqyt boıynsha shamamen 09:13-te (06:13 GMT) bolǵanyn habarlady. Tikushaq Losaıbadaǵy jabaıy tabıǵat qoryǵynan Evaso Nıro ózenine qaraı áýe saıahatyn jasap bara jatqan. Bul ózen birneshe ulttyq qoryqtardyń boıymen aǵyp ótedi.
Áleýmettik jelide taraǵan sýrette Ololokve taýyndaǵy apat ornynan tútin kórinedi. Kenıa Qyzyl Kresi BBC-ge apat ornyna áli jetý múmkin emes ekenin, alaıda jaǵdaıdy baǵalaý úshin drondar qoldanylyp jatqanyn aıtty.
KCAA málimetinshe, apatqa ushyraǵan tikushaq — Eurocopter EC130 B4 úlgisi. Ákimshilik jedel jumystardy úılestirip jatyr. Kólik mınıstrligi men Áýe apattaryn tergeý departamenti apattyń mán-jaıyn anyqtaý boıynsha tergeý júrgizetinin málimdedi.