Keıbireý bezdi deıdi qatynynan
Týysqan, baýyr, bala, jaqynynan.
Qańǵyryp Tolstoısha óler deıdi,
Shatasyp qartaıǵan soń aqylynan.

Men bolsam Tolstoıdaı, armanym joq,
Shatasyp aqylymnan qalǵanym joq.
Syrymdy biletuǵyn sender emes,
Óleıin dep elsizge barǵanym joq.

Taza oı oılaı almas úıde basym,
Oısyz sińbes boıyma ishken asym.
Oı jemisin teremin ólgenimshe,
Ósektesin, kúndesin meıli qasym.

Nadandardyń sógýi aıyp emes,
Men eshkimge baılaýly zaıyp emes.
Haqıqatty jyrlaǵan keleshekte
Merzim bolyp shyǵýy ǵaıyp emes.

Kıim bútin, astymda at, tamaq daıyn‚
Basym úshin kemshilik, joq ýaıym.
Izdegenim mal, mansap, maqtan emes,
Oı kózimen tekserseń, málim jaıym.

---