Kókshetaýda jeti jergilikti turǵyn alaıaqtyqtyń qurbany bolyp, jalpy somasy 20 mln teńgeden astam qarajattan aıyryldy. Osy faktige qatysty polısıa sotqa deıingi tergeý júrgizip jatyr, dep habarlaıdy infohub.kz saıty.
İİM portalynyń málimetinshe, kúdikti óziniń tanystaryna memlekettik nemese jaldamaly baspana alý kezegin jyljytýǵa kómektesetinin usynǵan. Qyzmeti úshin ol aqshalaı syıaqy talap etken. Alǵashqy aryz maýsym aıynda Kókshetaý qalalyq polısıa basqarmasyna túsken. Keıinnen osyǵan uqsas aryzdarmen basqa da azamattar júgingen. Jeti jábirlenýshige keltirilgen jalpy zalal 20 mln teńgeden asty.
Polısıada: «Qazirgi ýaqytta kúdikti ustalyp, tergeý ızolátorynda otyr. Sotqa deıingi tergeý aıasynda jasalǵan qylmystardyń barlyq mán-jaıy men egjeı-tegjeıi anyqtalýda», — dep habarlady.
Quqyq qorǵaý organdary azamattardy syıaqy úshin máseleni sheshýge ýáde beretin kúmándi usynystarǵa senbeýge shaqyrady. Alaıaqtar bóten aqshany ıemdený úshin ártúrli syltaýlardy paıdalanady, sonyń ishinde baspana alýǵa, jumysqa ornalasýǵa, qujattardy rásimdeýge jáne basqa da qyzmetterge kómektesetinin aıtady.
İİM-de: «Eger sizge aqshaǵa memlekettik qyzmetti "tezdetý" nemese belgilengen tártipten tys máseleni sheshý usynylsa, aqsha bermeńiz jáne tıisti memlekettik mekemege habarlasyp, aqparattyń shynaıylyǵyn mindetti túrde tekserińiz», — dep qosty.