Kıevte kafe ıesi ári barısta Rostıslav esimdi jigit dron shabýylynan keıin demalyp otyrǵan eki komýnaldyq qyzmetker áıeldi baıqap, olardyń jumys kúnin sál de bolsa jarqyn etýdi uıǵaryp, kofe men táttiler alyp shyqty. Bul áreket beınebaqylaý kameralaryna túsip, keıin áleýmettik jelilerge tarap, qoldanýshylardyń júregin jaýlady, dep habarlaıdy infohub.kz saıty.
23 qyrkúıekte Kıev taǵy bir dron shabýylyn bastan ótkerdi. Tańǵy atqylaýdan keıin eki komýnaldyq qyzmetker áıel qalany tazalaýdy jalǵastyryp, bir kafeniń jazǵy terasasynyń janynda sál demaldy. Áıelderdiń biri kafe oryndyǵyna otyrýǵa uıalyp, qaltany tósep, bordúrge otyrdy.
Muny kafe ıesi ári barısta Rostıslav baıqady. Uzaq áńgimege barmaı, ol áıelderge kofe men táttiler toltyrylǵan tabaq alyp shyǵyp, ústelge shaqyrdy jáne adamı turǵydan jumystary úshin alǵys aıtty. Sodan keıin Rostıslav olardy qushaqtap, bireýi otyrǵan qaltany kóterip aldy.
Kofe, azdap tátti jáne birneshe jyly sóz — bári osy. Biraq vıdeo kútpegen jerden vırýstyq sıpatqa ıe boldy. Áleýmettik jeli qoldanýshylary Rostıslavtyń áreketin belsendi talqylap, rolık 3,3 mln qaralym men 155 myń laık jınady. Pikirlerde adamdar qıyn kúni jumysyn jalǵastyrǵandarǵa qamqorlyq tanytqany úshin barıstaǵa alǵys aıtýda.
«Adam bolyp qalǵan jandardyń bar ekeni qandaı baqyt!», «Meıirimdi adamdardy jaqsy kóremin, ulty mańyzdy emes!», «Osyndaı adamdardyń arqasynda álem áli de ómir súrýde», «Bul meniń búgin kórgen eń jaqsylyǵym», «Maǵynasyz soǵys», – dep jazady pikir qaldyrýshylar.
Keıde jaqsylyq jasaý úshin úlken sebep qajet emes. Kóbimiz baıqamaı júrgenderge alǵys aıtýdyń ózi jetkilikti.
Buǵan deıin Kursiv LifeStyle qazaqstandyq bloger Arman Al-Amınniń kýrer bolyp jumys isteý týraly áńgimesi áleýmettik jeli qoldanýshylaryn beı-jaı qaldyrmaǵanyn jazǵan bolatyn. Óz vıdeosynda ol buryn jasyryp kelgen kezeńi týraly shynaıy aıtty.