Soltústik Kıpr jaǵalaýynda jolaýshylar paromy apatqa ushyrap, kem degende jeti adam qaza tapty, taǵy 23 adam habar-osharsyz ketti, dep habarlaıdy infohub.kz saıty.
Bortynda 259 jolaýshysy jáne segiz ekıpaj múshesi bolǵan FILOJET kemesi Kırenıa portynan shyǵyp, Mersın provınsıasyndaǵy túrik porty Tashýdjýǵa bet alǵan. Gavannan shyqqannan keıin kóp uzamaı parom belgisiz sebeppen sýǵa tola bastaǵan, ol jaǵalaýdan shamamen tórt teńiz mıli qashyqtyqta bolǵan, sodan keıin aýdarylǵan.
Jarıalanǵan kadrlarda qutqarý keýdeshelerin kıgen jolaýshylardyń aýdarylǵan kemeniń korpýsynda turyp, kómek kútip turǵany kórinedi. Kıpr túrikteriniń kóshbasshysy Týfan Erhúrman: «Biz 237 adamdy tirideı taptyq. Jeti adam qaza tapty, taǵy 23 adamdy izdeýdi jalǵastyrýdamyz», — dep málimdedi.
Qazaqstan Syrtqy ister mınıstrliginde aldyn ala derekter boıynsha apatqa ushyraǵan keme bortynda el azamattary bolmaǵanyn habarlady. QR SİM baspasóz qyzmeti: «Aldyn ala derekter boıynsha, Kıpr araly jaǵalaýynda apatqa ushyraǵan keme bortynda Qazaqstan Respýblıkasynyń azamattary bolǵan joq. Qazaqstandyq dıplomattar aqparatty tekserýdi jalǵastyrýda», — dep málimdedi.
Qutqarý operasıasyna jaǵalaý kúzetiniń toǵyz kemesi, azamattyq jolaýshylar kemesi jáne eki tikushaq jumyldyrylǵan. Mamandar sondaı-aq parom ishinde qalýy múmkin adamdardy izdeý úshin qosymsha jabdyqty paıdalanýda. Aldyńǵy kúni Kıprde daýyldy aýa raıy baıqalǵan, alaıda Erhúrmannyń aıtýynsha, parom teńizge shyqqan kezde aýa raıy jaǵdaıy júzýge qolaıly dep sanalǵan. Apattyń naqty sebebin anyqtaý kerek.