Bir Adam aıdalada elden jyraq,
Jeke-taq, japan túzdi qyldy turaq.
Jaıaýlyq, jalańashtyq jaqsy emes qoı,
Jalǵyzdyq olardan da qıynyraq.
Kók shalǵyn, aǵash, bulaq - bári jaqsy,
Bolmaıdy naq adamdaı serik biraq.
Sóılesip ishten sherin tarqata almaı,
Jeke-taq qapalandy jalǵyzsyrap.
Bir kúni kele jatty aǵash jaqqa,
Nendeı jan kez bolar dep tanyspaqqa.
Ormanda Qasqyr, Aıý ań bolmasa,
Tabylsyn onan basqa kim beıbaqqa!
Aıtqandaı qarsy aldynan Aıý keldi,
Bul oǵan taǵzymmenen sálem berdi.
Kórisip, qol alysyp amandasyp,
Sóılesip, birte-birte tanysty endi.
Dos boldy aqyrynda Aıý, Adam,
Zor boldy tatýlyǵy bir týmadan.
Ekeýi kúndiz-túni bolyp birge,
Baspady bir-birinen oqshaý qadam.
Sóılesken áńgimesin eshkim bilmes,
Ázil me, ertegi me, jaı ma keńes?
Jeke-taq eńgimege joq kisi edi,
Aıý da týǵannan-aq myljyń emes.
Sóılesip qanbasa da keńeske kóp,
Áıteýir sol Aıýdy jaratty bek.
Bir saǵat sabyr qylmaı, saǵynady,
Kózinen tasa bolsa joldasy tek.
Osylaı áldeneshe kúnder ótti,
Shilde bop, kúnniń yssy kezi jetti.
Aralap oıdy, qyrdy, orman, taýdy,
Eki dos kún yssyda saıran etti.
Júre almaı, Adam sharshap, tala berdi,
Ár jerde turyp, demin ala berdi.
Aıýdan Adam nashar bolǵannan soń,
Ere almaı, keıin, artta qala berdi.
Sonda oǵan Aıý aıtty: «Jeke-taq jan!
Aıtaıyn men bir aqyl, qúlaǵyń sal.
Kúzetip, jan jolatpaı men turaıyn,
Sen uıyqtap, birazyraq tynyǵyp al!».
Jeke-taq joldasynyń tilin aldy,
Shapanyn sheshti daǵy, tósep saldy.
Boldyryp kúni boıy júrgen beıbaq,
Jatty da, bir esinep, uıyqtap qaldy.
Al endi Aıý turdy qaraýylda,
Kiná joq baǵyp dosyn qaraýynda.
Qoryldap uıyqtap jatqan jeke-taqtyń
Bir shybyn kelip qondy tanaýyna.
Shybyndy kelip qonǵan Aıý kórdi,
Bir qýyp jiberip ed, qaıtyp keldi.
Úrkitip áldeneshe qýsa daǵy,
Ketpedi, qaıta-qaıta qona berdi.
İPybynǵa Aıý qatty ashýlandy,
Kóterip jerden áıdik bir tas aldy.
Jáne kep mańdaıyna qonǵan shaqta,
Taspenen pármeninshe qoıyp qaldy.
Urǵan tas dáldep tıdi jeke-taqqa,
Kez bolǵan qaı ońdy dos ol beıbaqqa.
Ia qaza, ıa bálege urynarsyń,
Egerde bolsań joldas aqymaqqa.
Tas tıip, bas súıegi qaq aırylyp,
Fanıden kóshti sorly baqı jaqqa.
Qaıyryn zaıǵy etse, keregi ne?
Kez qylmaı, ondaı dostan, Qudaı, saqta.

* * *
Jigitter, saqtanyńyz nadan dostan,
Dosyńnan, nadan bolsa, artyq dushpan.
Belgili jaýdan kisi kútinedi,
Tıedi dostyń oǵy qapylystan.

---