Koreı Halyq Demokratıalyq Respýblıkasynyń Syrtqy ister mınıstrligi memorandým daıyndap, Amerıka Qurama Shtattarynyń áreketterinen «qorqynyshty ıadrolyq apat» bolýy múmkin dep eskertti, dep habarlaıdy infohub.kz saıty.
Phenán AQSH-tyń ıadrolyq kúshin ulǵaıtýy, sondaı-aq ıadrolyq qarý men tehnologıalardy taratý jónindegi áreketteri halyqaralyq ıadrolyq tártipti tolyq kúıreýge ákeldi dep senedi.
«Eger AQSH-tyń ıadrolyq tehnologıalardy tik jáne kóldeneń taratý jónindegi áreketteri ári qaraı jazasyz qalsa, "Pandora jáshigi" tolyq ashylyp, adamzatqa qorqynyshty ıadrolyq apat tónetin bolady», — delingen qujatta.
KHDR Vashıngtondy ıadrolyq qarýsyzdaný jónindegi mindettemelerden bas tartty, óziniń ıadrolyq áleýetin ulǵaıtty jáne odaqtastaryna ıadrolyq tehnologıalardy taratty dep aıyptady.
«AQSH-tyń AUKUS-qa Japonıa, Ońtústik Koreıa, Jańa Zelandıa jáne Kanada sıaqty odaqtastaryn tartyp, ony ataýy jaǵynan da, mazmuny jaǵynan da álemdegi eń úlken atom súńgýir qaıyqtar alánsyna aınaldyrýǵa tyrysyp jatqanyn da nazardan tys qaldyrýǵa bolmaıdy», — dedi eldiń syrtqy saıası vedomstvosy.
Phenánnyń pikirinshe, AQSH-tyń Ońtústik Koreıanyń atom súńgýir qaıyqtaryna ıe bolýyn maquldaýy ıadrolyq tehnologıalardyń «AUKUS úlgisimen» taratylǵanynyń taǵy bir dáleli jáne Azıa-Tynyq muhıty aımaǵyndaǵy áskerı-saıası jaǵdaıǵa turaqsyzdyqtyń jańa faktoryn qosady.
«AQSH-tyń ıadrolyq kúshin jedel ulǵaıtýy men ıadrolyq tehnologıalardy ashyq taratý áreketterinen halyqaralyq ıadrolyq tártip tolyq kúıreýge ushyraǵan qazirgi geosaıası jaǵdaı bizdiń memleketten álemdegi beıbitshilikti qorǵaýda jáne jahandyq strategıalyq turaqtylyqty qamtamasyz etýde neǵurlym belsendi ról atqarýdy talap etedi», — dedi KHDR.
Aıta keteıik, jaqynda KHDR Qorǵanys mınıstrligi AQSh pen Ońtústik Koreıanyń qaýip-qaterlerine jaýap retinde «memlekettik ıadrolyq qarýly kúshter máseleleri jónindegi saıasat týraly zańnyń babyn» iske qosýǵa qorqytty. Osydan keıin KHDR-dyń zymyran áskerleri jańa tıptegi qarýdy synaqtan ótkizdi — Soltústik Koreıa kóshbasshysy Kım Chen Yn jańalyqty «jeńilmeıtin kúsh» dep atady.
Al ótken aptada KHDR AQSh, Japonıa jáne Ońtústik Koreıanyń eldi denýklearızasıalaý týraly málimdemesin aıyptap, onyń ıadrolyq mártebesi myzǵymas kúıde qalatynyn eskertti.