Qazaqstandyq KMF Bank halyqaralyq ınvestor izdeýge kiristi. Bolashaqta ol qarjy ınstıtýtynyń kapıtalyna kire alady. Qazirdiń ózinde birneshe halyqaralyq ınstıtýsıonaldyq ınvestorlarmen jáne qarjy sektoryndaǵy strategıalyq seriktestermen kelissózder júrip jatyr. Bul týraly bank basqarma tóraǵasy Shalqar Júsipov Forbes Kazakhstan-qa bergen suhbatynda aıtty, dep habarlaıdy infohub.kz.
Qazir KMF Banktiń majorıtarlyq aksıoneri — «KMF-Demeý» qory. Oǵan bank aksıalarynyń 60,4%-y tıesili. Qor amerıkandyq ACDI/VOCA uıymynyń qoldaýymen qurylǵan jáne jyldar boıy KMF-tiń damýyna serik boldy.
Júsipovtiń aıtýynsha, bank ózin derbes qarjy ınstıtýty retinde qalyptastyrdy, sondyqtan «KMF-Demeý» birtindep majorıtarlyq aksıoner mártebesinen mınorıtarlyqqa ótýge daıyndalýda.
Degenmen bank basshysy naqty áleýetti ınvestordy atamady. Ol tek birqatar halyqaralyq ınstıtýsıonaldyq ınvestorlarmen jáne strategıalyq seriktestermen kelissózder júrip jatqanyn ǵana habarlady.
«Biz úshin mıkro jáne shaǵyn bıznesti damytýǵa, áıelder kásipkerligin qoldaýǵa, óńirler men qarjylyq ınklúzıaǵa baǵyttalǵan kózqarasymyzben bólisetin seriktes tabý óte mańyzdy. Mundaı ınvestor aksıonerler qurylymyn ártaraptandyryp qana qoımaı, halyqaralyq tájirıbe, ozyq ádister men banktiń odan ári damýyna qosymsha múmkindikter ákele alady», — dedi ol.
«KMF Bank» qazirdiń ózinde birqatar halyqaralyq qarjy uıymdarymen jáne damý ınstıtýttarymen yntymaqtasady. Olardyń qatarynda Eýropa qaıta qurý jáne damý banki, IFC, Proparco, Aýstrıa damý banki, SIFEM jáne JICA bar. Bank sondaı-aq Túrik ınvestısıalyq qorymen seriktestik ornatqan.
Eske salaıyq, 2025 jylǵy 12 tamyzda KMF banktik lısenzıa aldy. Oǵan deıin bul mıkroqarjy uıymy edi. Ulttyq banktiń dereginshe, aınalýǵa deıin ol MUU arasynda aktıvter kólemi boıynsha birinshi orynda turǵan. Al bankter arasynda qarjy uıymy 23-tiń ishinde 18-orynǵa jaıǵasqan.
«KMF-Demeý» quryltaıshysy — AQSH-ta tirkelgen ACDI/VOCA komersıalyq emes uıymy.