Aqmola oblysyndaǵy biregeı kól – Kóbeıtuz astanadan 160 shaqyrym jerde ornalasqan. Prezıdent tapsyrmasyna sáıkes, ol erekshe qorǵalatyn tabıǵı aýmaq mártebesin alady. Bul týraly infohub.kz saıty habarlaıdy.
Ol úshin Buırataý ulttyq parkiniń shekarasy keńeıtiledi – onyń quramyna kól aıdyny kiredi. Bılik osylaısha kóldiń biregeı ekojúıesin saqtap qalýdy kózdeıdi.
Sonymen qatar, kól mańynda abattandyrý jumystary bastalady. Jaǵalaýda turaq alańy men baqylaý alańy jabdyqtalady. Bul týrıserdiń kóldi tamashalaýyna múmkindik berip, jaǵalaý syzyǵyn búldirmeýge kómektesedi. Jumys kezinde kólge kirý shekteledi.
«Jaǵalaý syzyǵyna jaqyndaýǵa jáne usynylǵan aımaqtan tys jerde bolýǵa jol berilmeıdi. Kólge kireberisterde táýlik boıy beketter uıymdastyrylady, aýmaqty patrúldeýdi polısıa ýákiletti organdarmen birge júzege asyrady», – delingen oblys ákimdiginiń habarlamasynda.
Buǵan deıin mamandar kól sýyn zerttegen. Taldaý nátıjesinde amıak, amonı azoty, hlorıdter, myshák jáne súlfattar sıaqty birqatar zattardyń ruqsat etilgen sheginen asqany anyqtalǵan. Sondyqtan Kóbeıtuz kólinde shomylýǵa jáne onyń jaǵalaýynan tuz jınaýǵa tyıym salynǵan.
Eske salaıyq, 2025 jyly jazda bılik Kóbeıtuz kólinde baqylaýdy kúsheıtken bolatyn. Sebebi týrıser tuz jınap, ony ınternette satyp júrgen.