Kofe ishý — kofeındi de, kofeınsiz de — ishek mıkrobıotasynyń quramyn ózgertip, ishek pen mı arasyndaǵy baılanysqa áser etedi, kóńil kúı men tanymdyq qyzmetti jaqsartady. Osyndaı tujyrymǵa Kork ýnıversıtettik koleji janyndaǵy APC Microbiome Ireland zertteý ortalyǵynyń ǵalymdary keldi. Olar sýsynnyń «ishek — mı» osine áserin zerttedi, dep habarlaıdy infohub.kz saıty.
Zertteý Nature Communications jýrnalynda Kofe týraly ǵylymı aqparat ınstıtýtynyń (ISIC) qoldaýymen jarıalandy. Oǵan kúnine 3–5 kese kofe ishetin 31 kofe súıer qaýym ókili jáne bul sýsyndy múlde ishpeıtin 31 adam qatysty.
Tájirıbe barysynda kofe súıerler aldymen eki apta boıy odan bas tartty — bul olardyń ishegindegi metabolıtter beıininde aıtarlyqtaı ózgerister týǵyzdy. Keıin sýsyndy taǵam rasıonyna soqyr túrde qaıtardy: bir topqa qarapaıym kofe, ekinshisine kofeınsiz kofe berildi. Qabyldaý qaıta bastalǵan soń eki top ta stress, depressıa jáne ımpúlsıvtilik deńgeıiniń tómendegenin aıtty.
Kofeni únemi ishetinderde qyshqyl bólinýge jáne ót óndirilýge qatysatyn, jaǵymdy emosıalarmen baılanysty Eggertella sp, Cryptobacterium curtum jáne Firmicutes bakterıalarynyń joǵary deńgeıi de tirkeldi.
Zertteý sýsynnyń ár túriniń áserinde aıyrmashylyq bar ekenin anyqtady: kofeınsiz kofe oqý men jady kórsetkishterin jaqsartty, bul polıfenoldar men antıoksıdanttardyń áserimen baılanystyrylady, al qarapaıym kofe úreı deńgeıin tómendetip, zeıindi arttyryp, qabyný qaýpin azaıtty.
Profesor Djon Kraıan kofeni ishek densaýlyǵy men emosıonaldyq ál-aýqatqa tek kofeın esebinen ǵana emes, áser etetin kúrdeli dıetalyq faktor retinde qarastyrý kerektigin atap ótti.