Sıdneıdiń batysyndaǵy Kók taýlar aımaǵynda, Vellı-Haıts eldi mekeninde jeksenbi kúni tústen keıin kólik ishinen úsh bala men bir áıeldiń denesinen pyshaq jaraqaty tabyldy. Jaralylarǵa alǵashqy bolyp kýágerler kómek kórsetti. Bir bala oqıǵa ornynda qaza tapty, qalǵan ekeýi men áıel aýrýhanada aýyr halde jatyr. Polısıa 40-tan asqan anany osy qandy oqıǵaǵa kúdikti dep otyr, dep habarlaıdy infohub.kz saıty.

Jedel járdem qyzmetkerleri zardap shekkenderge oqıǵa ornynda kómek kórsetip, olardy Vestmıd aýrýhanasy men Vestmıd balalar aýrýhanasyna jetkizdi. Barlyǵynyń jaǵdaıy aýyr. Kúdikti áıel de aýyr halde, sondyqtan tergeýshiler onyń jazylýyn kútýge májbúr.

Jańa Ońtústik Ýels polısıasynyń bas komısary Pıter Makkenna bul demalys kúnderin «qorqynyshty ári qaıǵyly» dep baǵalady. «Men mansabymda mundaıdy esimde saqtamappyn. Úsh oqıǵa, oǵan qosa Kók taýlardaǵy apat. Barlyǵyn qosyp qarasań, aqylǵa syımaıdy», — dedi ol dúısenbide Nine arnasynyń Today baǵdarlamasyna bergen suhbatynda.

Makkennanyń aıtýynsha, áıel — otbasylyq qatynastarǵa baılanysty qylmys boıynsha kúdikti, tergeý jalǵasýda. «Eger ol jaraqatynan aıyqsa, bizdiń qyzmetkerler ony qasaqana kisi óltirý boıynsha aıyptaýǵa nıetti», — dep málimdedi ol.

Oqıǵadan birneshe saǵat ótken soń polısıa balalardyń ákesine habarlaǵanyn jetkizdi. Ákesi sol kezde jumysta bolǵan. Ol dereý aýrýhanaǵa jetkizilip, aman qalǵan eki balasynyń qasynda otyr. «Ol tergeýge kómektesip jatyr», — dedi Makkenna.

Kúdikti áıel buǵan deıin polısıanyń nazaryna ilikpegen, al tergeýshiler osy oqıǵaǵa qatysy bar basqa adamdardy izdestirmeıdi. Áıel 40-tan asqan, al úsh balanyń barlyǵy bes jasqa tolmaǵan. Úsheýine de aýrýhanada ota jasaldy.

Polısıa sýperıntendanty Djon Nelson oqıǵa ornyna birinshi bolyp jetken azamattardyń erligin atap ótti. «Adamdar jaı ǵana jeksenbi kúni serýendep júrip, osyndaı qorqynyshty jaǵdaıǵa tap bolady. Bul kez kelgen adam úshin aýyr», — dedi ol. Oqıǵaǵa jaýap bergen qyzmetkerlerge de psıhologıalyq qoldaý kórsetiletinin jetkizdi.

Polısıa qarý túri men oqıǵa mán-jaıyn tergeý barysynda anyqtaıtynyn habarlady. Kók taýlar okrýginiń keńesshisi Darren Rodrıgo jańalyqty «tóbe shashy tik turarlyq qaıǵyly oqıǵa» dep atady. «Otbasyǵa qaıǵyryp kóńil aıtamyz, barlyq balalarǵa duǵa tileımiz. Alǵashqy medısınalyq kómek kórsetken qaýym múshelerine jáne qutqarýshylarǵa zor alǵys», — dedi ol.

Makkennanyń aıtýynsha, demalys kúnderi otbasylyq zorlyq-zombylyqqa baılanysty taǵy úsh qaıǵyly oqıǵa tirkeldi — Ýogga, Tenterfıld jáne Bondıde. «Barlyq tórt oqıǵada pyshaq nemese ótkir qarý qoldanylǵan», — dedi ol. «Bul shynymen de aýyr», — dep qosty bas komısar.

Osy maqaladaǵy taqyrypqa baılanysty kómek qajet bolsa, Full Stop Australia uıymyna 1800 385 578 nómiri arqyly habarlasýǵa bolady.