Kókónister týraly ertegi
Bir baqshada ár túrli kókónister ósipti.
Jasyl qıar – aqkóńil, ázilkesh, eshqashan qaıǵyrýdy bilmeıtin, barlyq kókónisterdi keketip – muqatqandy unatatyn.
Qyzyl qyzanaq – mańyzdy, qashan da sándi. Ol «Búgin jańbyr jaýady dep oılaımyn» degen sózderdi jıi aıtady eken. Shynyńda da jańbyr jaýǵan kezde qyzanaq: «Kórdińder me! Meniń aıtqanym durys keldi ǵoı!» dep taǵy maqtanady eken. Eger jańbyr bolmasa, qyzanaq saspaı, ózi aıtqan sózge qatysy bolmaǵandaı turatyn.
Qyzǵyltsary sábiz bolsa: «Meniń bar sylýlyǵym jer astynda jatyr, eshkim kórmeıdi, men baqytsyzbyn!» dep árdaıym kóńilsiz bolyp, burqyldaıtyn kórinedi.
Aqqadaýndy qyryqqabat – kishipeıil, sózsheń. Ol «Basynda japyraǵym ekeý – aq edi, qazir tipti kóbeıip ketti.» - dep, barsha aıtar áńgimesi tek kıimniń aýyrlap ketkendigi jaıly.
Qońyr kartop bolsa – qaıyrymdy, meıirban. Baqshadaǵy kókónistermen túgel dos bolyp, bárine kómektesedi. Kartopty bári jaqsy kóredi.
Bas pıaz – jaǵymsyz, ol aınalasyndaǵylardyń kózderinen jas aǵyp, únemi jylap júrgenderin unatatyn.
Mine, osyndaı túrli minezdi kókónister sıysyp, bir baqshada ósipti. Qalaı oılaısyńdar, osyndaı minez - qulyqtar adamdar ómirinde kezdese me?