Kókshetaýda turǵyn úı keshenine bes jyl boıy kóshýdi kútken 150-ge jýyq otbasy qurylysy aıaqtalmaǵan ǵımaratqa kóship kirýge sheshim qabyldady. Sebep — qurylystyń únemi keıinge shegerilýi jáne tolyq toqtap qalýy, dep habarlaıdy infohub.kz saıty.
Úleskerler jylý men jaryqtyń joqtyǵyna, sondaı-aq qurylys salýshylardyń olardyń ótinishterin elemeıtinine shaǵymdanýda. «Eki jyl buryn osy turǵyn úı kesheninen páter satyp aldym. Bes jyl boıy adamdar kútip júr. Jylý óshirilgen. Turaqty jaryq ta joq. Qurylys salýshylar baılanysqa shyqpaıdy, múldem elemeıdi, qazir tolyq áreketsizdik. Qazir kúz, jańbyr jaýyp tur, shatyr da aǵyp jatyr», — dedi úleskerlerdiń biri Sándýǵash Alǵazınova.
Bes úıden turatyn turǵyn úı kesheninde satyp alýshylarǵa qolaıly baǵamen jaıly baspana ýáde etilgen, tapsyrý 2022 jylǵa josparlanǵan edi. Kópshilik páterdi qabyrǵalary qalanbaı turyp-aq satyp alǵan, biraq úmit aqtalmady. Qazirgi ýaqytta 72 páterlik bir ǵana úı salynǵan, alaıda ishki jumystar aıaqtalmaǵan, elektr jaryǵy joq. Osyǵan qaramastan, úıge páterin satyp alyp, nesıe tólep jatqan jáne endi jaldamaly baspana tóleı almaıtyn 20 otbasy kóship kirdi. Ekinshi úıde tek qańqasy ǵana turǵyzylǵan, al qalǵan úsh úıde tek irgetasy qalanǵan.
Sheneýnikter jyl sońyna deıin alǵashqy eki úıdiń turǵyndary jaıly jaǵdaıda tura alady dep sendirýde. «Qazir olar osy jobadaǵy mindettemeler men paıda alý boıynsha ózara qosymsha kelisimge qol qoıýda. Turǵyndarǵa qatysty jaǵdaı boıynsha biz únemi keńes ótkizýge tyrysamyz, ıaǵnı qazir ákimdikte ár sársenbi saıyn keńes ótedi. Bul másele qala ákiminiń baqylaýynda», — dedi Kókshetaý qalalyq ákimdiginiń jer qatynastary, sáýlet jáne qala qurylysy bóliminiń basshysy Baqtıar Shabdanov.