Kókshetaýda jedel ýákilder ortalyq basqarý púltiniń (OBP) kameralary arqyly urlanǵan kóliktiń baǵytyn anyqtap, kúdiktini ustady, dep habarlaıdy infohub.kz saıty.
Aqmola oblysy polısıa departamentiniń baspasóz qyzmetiniń málimetinshe, 2 qyrkúıek tańerteń jergilikti turǵyn «VAZ-2112» kóliginiń urlanǵany týraly aryzben polısıaǵa júgingen. Iesiniń aıtýynsha, belgisiz bireý kólikti úıiniń aýlasynan alyp ketken. Tekserý barysynda kólik qulyptalmaǵan, al kiltter salonda qalǵany anyqtaldy. Osy abaısyzdyqty paıdalanǵan qylmysker.
Aryz túsken boıda polıseıler jedel-izdestirý is-sharalaryn bastady. Sonyń ishinde qalalyq beınebaqylaý kameralarynyń jazbalary zerttelip, urlanǵan kólikke berilgen baǵdar barlyq patrúldik narádtarǵa jetkizildi. Tekserý barysynda OBP kameralarynyń biri urlanǵan kólikti tirkep, onyń qozǵalys baǵytyn baqylaýǵa múmkindik bergen. Alynǵan aqparat patrúldikterge jedel jetkizildi.
Qabyldanǵan sharalardyń nátıjesinde ınspektorlar Qýanysh Sádbekov pen Beıbit Qambashevtan quralǵan ekıpaj kúdiktini sol kúni ustady. Kólikti ıemdengennen keıin onyń temeki izdep qala boıynsha júrgeni anyqtaldy. Urlyq faktisi boıynsha tergeý júrgizilip, oqıǵanyń barlyq mán-jaıy anyqtalýda.