Kókshetaýda úleskerlerge qatysty janjal órship tur: 18 adam turǵyn úı qurylysyna 120 mln teńgeden astam qarajat salǵan, biraq páterlerin ala almaǵan, dep habarlaıdy infohub.kz.
Tórt jyl ishinde qurylys salýshy josparlanǵan on eki qabattyń tek bireýin ǵana turǵyzǵan. Úleskerlerdiń aıtýynsha, 2022 jyly shartqa qol qoıar aldynda olarǵa tartymdy joba kórsetilip, jeke baspana týraly armandarynyń jaqyn arada oryndalatynyna sendirgen.
«2023 jyly men aqshamdy alýǵa keldim, bermedi: „Osy úıdiń ishinen qoıma bólmesin beremiz“ dedi. Bir jyldan keıin — birneshe qada soqty. Taǵy bir jyldan soń aqsha surap kelsem, „Kúte turyńyz. Aıyppuldy sharshy metrmen beremiz“ deıdi. Túsinesiz be? Mine, 2022 jyldan beri 2026 jylǵa deıin eshteńe ala almadym!» — dep narazylyq bildirdi Jumataı Tájibaev.
Úleskerler aqparat jınaı bastaǵanda, quryltaıshy kompanıa bankrottyq rásimin bastaǵanyn anyqtaǵan. «Biz ákimdikten de, prokýratýradan da osy máseleni sheshýdi suradyq. Qylmystyq is qozǵaý úshin ótinish berdik, óıtkeni bul alaıaqtyqqa uqsaıdy. Aqshany jınap alyp, qurylys toqtap tur. Eshqandaı iz taba almaı otyrmyz», — dedi Sara Aqtaeva.
Qurylys salýshynyń zańgeri kompanıanyń ózi jaǵdaıdyń kepiline aınalǵanyn aıtady. Onyń sózinshe, 2021 jyly fırma úleskerlerdiń qarajatyn tartýǵa quqyly bolǵan, bank-operatormen kelisim jasap, jeńildikti baǵdarlama boıynsha turǵyn úı satpaq bolǵan. Alaıda jaǵdaı ózgerip, qazir kompanıa jeke ınvestorlardy izdestirýde. «Negizgi sebep — „Turǵyn úı qurylys jınaq banki“ jeńildikti nesıelendirýdi toqtatty, soǵan baılanysty ruqsat keri qaıtaryldy. Tıisinshe, qurylys toqtatyldy. Ótken jyldyń qyrkúıeginde Almaty qalasynan bir ınvestısıalyq kompanıamen kelisimshart jasadyq. Biraq ázirge belgisiz sebeptermen qarjy quıylmaı otyr», — dep túsindirdi zańger Ildar Hısmýtdınov.
Ákimdikte úleskerler máselesin sheshý basym baǵyt ekenin aıtty. Óz tarapynan olar kómektesýge tyrysyp otyr — ınvestor tabylǵan syńaıly. «Olardan úleskerler sany men joba quny týraly málimet aldyq. Qazir olar jobany tolyǵymen aıaqtaý úshin ishki esep júrgizip jatyr. Qala ákimdigi tarapynan qoldaý kórsetiledi — jer telimderi men tehnıkalyq jaǵdaılar jasalady», — dedi Kókshetaý qalalyq jer qatynastary, sáýlet jáne qala qurylysy bóliminiń basshysy. Alaıda naqty merzimderdi vedomstvo atamady.