Kókjótel náresteler úshin ómiriniń alǵashqy aılarynda asa qaýipti, óıtkeni olardyń óz ımýndyq qorǵanysy endi ǵana qalyptasa bastaıdy. 2026 jyldyń basynan beri Qazaqstanda osy ınfeksıanyń 250 jaǵdaıy anyqtaldy. Densaýlyq saqtaý mınıstrliginiń dereginshe, naýqastardyń 90%-y — bes jasqa deıingi ekpe almaǵan balalar, dep habarlaıdy infohub.kz saıty.

Kókjótel — Bordetella pertussis taıaqshasynan týyndaıtyn jedel respıratorlyq bakterıalyq ınfeksıa. Aýrý qurysý túrindegi jótel ustamalarymen kórinedi, odan keıin qoıý qaqyryqpen qusý baıqalady. Infeksıa aýa-tamshy jolymen juǵady. Basty qaýip asqynýlarda: kókjótel ókpe qabynýyna, tipti mıdyń zaqymdanýyna ákelýi múmkin.

Ulttyq qoǵamdyq densaýlyq saqtaý ortalyǵynyń ımýndyq profılaktıka ortalyǵynyń jetekshisi Nurshaı Ázimbaevanyń túsindirýinshe, ınfeksıadan qorǵanysty bala dúnıege kelmeı turyp-aq qalyptastyrýǵa bolady. Júktilik kezinde ana plasenta arqyly uryqqa antıdeneler beredi.

«Júktilik kezinde ana plasenta arqyly balaǵa antıdeneler beredi. Anany kókjótelge qarsy vaksınasıalaý bolashaq balanyń da alatyn spesıfıkalyq antıdeneler deńgeıin arttyrady. Olar balaǵa týǵannan keıin ınfeksıaǵa qarsy turýǵa kómektesedi», — dedi sarapshy.

Alaıda ýaqyt óte kele mundaı qorǵanys álsireıdi, sondyqtan bala dúnıege kelgennen keıin Ulttyq egý kúntizbesine sáıkes vaksınasıadan ótýi qajet. Qazaqstanda kókjótelge qarsy vaksınasıa eki aılyqtan bastalady.

«Imýnıtet qalyptastyrý úshin ulttyq egý kúntizbesinde qarastyrylǵan barlyq dozany alý qajet», — dep atap ótti Ázimbaeva.

Otbasy da ekpe alýy kerek. Náreste úshin ınfeksıa kózi ata-anasy, úlken balalary jáne basqa da jaqyn adamdary bolýy múmkin, sondyqtan tek qana náresteni ǵana emes, ony qorshaǵan adamdardy da egý mańyzdy. Sonymen qatar eresekterde kókjótel keıde uzaqqa sozylatyn jótel túrinde kórinedi, al kishkentaı balalarda ınfeksıa aýyr ótýi múmkin.

«Búgin náresteni qorǵaı otyryp, biz onyń ómiriniń eń mańyzdy kezeńin — alǵashqy aılaryn saqtaımyz», — dedi Ulttyq qoǵamdyq densaýlyq saqtaý ortalyǵynyń ımýndyq profılaktıka ortalyǵynyń jetekshisi.

Ulttyq egý kúntizbesine sáıkes, ómiriniń birinshi jylynda bala qatarynan úsh doza alady — 2, 3 jáne 4 aıda. 18 aıda alǵashqy revaksınasıa, kelesisi — 6 jasta jasalady. Josparly vaksınasıany bala tirkelgen emhanada tegin jasatýǵa bolady. Ekpe aldynda balany dáriger tekserýi tıis.