Qaraǵandyda sot «kútpegen jaǵdaılarǵa» arnalǵan qolhat týraly isti qarady: bir tarap aqshany qaıtarýdy talap etse, ekinshisi eshteńe almaǵanyn málimdedi, dep habarlaıdy infohub.kz.
Joǵarǵy Sottyń resmı Telegram-arnasynda habarlanǵandaı, Qaraǵandy qalasy Bókeıhan aýdanynyń sotyna ózara talap-aryzdar tústi: bastapqy talap – nesıe sharty boıynsha aqshany óndirip alý, qarsy talap – mámileni jaramsyz dep taný týraly.
Talapkerdiń aıtýynsha, taraptar arasynda nesıe sharty jasalǵan, oǵan sáıkes jaýapkerge qaryzyn óteý úshin aqsha berilgen. Nesıeni qaıtarý mindettemesi oryndalmaǵandyqtan, talapker qaryz somasyn, turaqsyzdyq aıyppulyn jáne sot shyǵyndaryn óndirýdi suraǵan.
Jaýapker talappen kelispeı, qolhatty jaramsyz dep taný týraly qarsy talap qoıdy. Ol aqshany almaǵanyn túsindirdi. Onyń aıtýynsha, ol jumysqa ornalasý úshin jeke kásipkerge júginip, kólik jaldaý shartyn jasasqan. Qolhat jeke kásipkerdiń nusqaýy boıynsha «kútpegen jaǵdaılarǵa» arnalyp jazylǵan, biraq is júzinde aqsha berilmegen. Jaýapker avtokólikti bir kún paıdalanyp, qaıtarǵan. Nesıe sharty boıynsha bereshegi men sot aktisi týraly ol keıin bilgen.
Zań boıynsha nesıe – naqty mámile jáne ol aqshany qaryz alýshyǵa naqty bergen sátten bastap jasalǵan bolyp esepteledi. Alaıda talapker aqshanyń berilgenin qujatpen rastaı almady. İs materıaldary qolhattyń naqty aqsha alynbaı jazylǵanyn dáleldedi.
Sonymen qatar, sot daýly mámileniń zańnama talaptaryn, sonyń ishinde sýbektilik quram men taraptar erkiniń erkindigin buza otyryp jasalǵanyn anyqtady. Shart jeke kásipker men jeke tulǵa arasynda resimdelgen, al nesıe berý zańnamada belgilengen shekteýlerge qaıshy kelgen.
Sot usynylǵan dáleldemelerdiń jıyntyǵyn baǵalaı kele, aqshanyń naqty berilgeni rastalmaǵan degen qorytyndyǵa keldi. Osyǵan baılanysty qolhatpen resimdelgen mámile jalǵan bolyp tabylady. Sot aqshany óndirý týraly bastapqy talapty qanaǵattandyrýdan bas tartty. Qarsy talap qanaǵattandyrylyp, qolhat boıynsha mámile Azamattyq kodekstiń 157-babynyń 1-tarmaǵy negizinde jaramsyz (joıylǵan) dep tanyldy.
Qaraǵandy oblystyq sotynyń azamattyq ister jónindegi sot alqasynyń qaýlysymen birinshi satydaǵy sot sheshimi ózgerissiz qaldyrylyp, apelásıalyq shaǵym qanaǵattandyrýsyz qaldyryldy. Sot sheshimi zańdy kúshine endi.