Qazaqstandyq kolejderge oqý prosesinen tys ýaqytta sportzaldar men baseınderdi jalǵa berýge ruqsat etildi. Bul týraly infohub.kz saıty habarlaıdy.
Oqý-aǵartý mınıstrliginiń baspasóz qyzmetiniń málimetinshe, Qazaqstan kolejderi oqý prosesinen bos ýaqytta dene shynyqtyrý-saýyqtyrý jáne sport nysandaryn jalǵa berý quqyǵyna ıe boldy. Tıisti ózgerister «Bilim týraly» Zańǵa «Qazaqstan Respýblıkasynyń áleýmettik zańnamasyn jetildirý máseleleri boıynsha keıbir zańnamalyq aktilerine ózgerister men tolyqtyrýlar engizý týraly» Zań aıasynda engizildi.
«Buryn mundaı múmkindik tek jalpy bilim beretin mektepterge ǵana qarastyrylǵan edi. Endi kolejderdiń sportzaldary, baseınderi, stadıondary jáne basqa da sport nysandary oqý sabaqtary aıaqtalǵannan keıin eldi meken turǵyndary paıdalana alady», — delingen vedomstvo habarlamasynda.
Jalǵa berýden túsken kiristi kolejder sport qurylystaryn kútip-ustaýǵa jáne jóndeýge, zamanaýı sport qural-jabdyqtaryn satyp alýǵa, sondaı-aq materıaldyq-tehnıkalyq bazany damytýǵa jumsaı alady. Bul ınfraqurylymdy tıisti deńgeıde ustap turýǵa jáne kolejderdiń bilim berý qyzmetin damytý múmkindikterin keńeıtýge septigin tıgizetini atap ótildi.
«Qabyldanǵan ózgerister memlekettik kolejderdiń sport ınfraqurylymyn tıimdirek paıdalanýdy qamtamasyz etedi, buqaralyq sportty damytýǵa, salaýatty ómir saltyn nasıhattaýǵa jáne Qazaqstan azamattarynyń dene shynyqtyrýmen sapaly jaǵdaıda aınalysýyna qoljetimdilikti arttyrýǵa yqpal etedi», — dep qosty mınıstrlik.