Tarazda kolektorlyq agenttik qaryz alýshylarmen WhatsApp messendjerinde tirkelmegen abonenttik nómirlerdi paıdalanyp baılanysqany úshin ákimshilik jaýapkershilikke tartyldy, dep habarlaıdy infohub.kz saıty.
Tarazdyń ákimshilik quqyqbuzýshylyqtar jónindegi mamandandyrylǵan soty kolektorlyq qyzmetpen aınalysatyn jaýapkershiligi shekteýli seriktestikke qatysty eki isti qarady. İstiń qozǵalýyna bir azamatshanyń Qarjy naryǵyn retteý jáne damytý agenttigine júginýi sebep boldy, ol uıymnyń qaryzdy óndirip alý kezindegi áreketterine shaǵymdanǵan.
Tekserý barysynda agenttik qyzmetkerleriniń shaǵymdanýshymen jáne úshinshi tulǵamen WhatsApp arqyly osy kolektorlyq agenttikke tirkelmegen nómirlerdi paıdalanyp hat jazysqany anyqtaldy. Bul «Kolektorlyq qyzmet týraly» zańnyń talaptaryna qaıshy keledi, onda kolektorlardyń qaryz alýshylarmen, olardyń ókilderimen jáne úshinshi tulǵalarmen ózara árekettesýiniń naqty tásilderi belgilengen.
Seriktestiktiń kinási is materıaldarymen, onyń ishinde hattamalarmen jáne taraptardyń aıǵaqtarymen rastaldy. Agenttik ókili kinásin moıyndap, ókinish bildirip, aıyppul somasyn azaıtýdy surady.
Sot kináni moıyndaýdy, ókinýdi jáne buryn quqyqbuzýshylyq jasamaǵanyn eskere otyryp, aıyppuldardy 30 paıyzǵa azaıtty. Nátıjesinde birinshi is boıynsha 605 myń teńge, ekinshisi boıynsha 302 myń teńge aıyppul taǵaıyndaldy.
Sot qaýlylary áli zańdy kúshine engen joq.