Kolýmbıanyń soltústik-shyǵysyndaǵy áskerı nysanǵa dronmen jasalǵan shabýyl saldarynan keminde úsh sarbaz qaza taýyp, tórteýi jaralandy. Bul týraly eldiń qarýly kúshteri senbi kúni málimdedi, dep habarlaıdy infohub.kz saıty.
Jergilikti bılik bul shabýyldy búlikshil Ulttyq azattyq armıasynyń (ELN) jaýapkershiligine jatqyzdy. Oqıǵa Venesýelamen shektesetin Norte-de-Santander departamentindegi Okaná mýnısıpalıtetindegi áskerı bólimge juma kúni keshke jasalǵan. Kolýmbıa áskeriniń málimetinshe, eki sarbaz oqıǵa ornynda, al úshinshisi medısınalyq kómek kórsetilgennen keıin qaza tapty.
Prezıdent Abeldardo de la Esprıella shabýyldy qatań aıyptady. «Árbir óltirilgen polıseı nemese sarbaz úshin biz qylmyskerlerge memlekettiń tolyq aýyrtpalyǵy men zańdy kúshin túsiremiz», — dedi Esprıella.
1964 jyldan beri áreket etip kele jatqan ELN-niń basym bóligi Norte-de-Santander men Sesar departamentteriniń bir bóligin qamtıtyn Katatýmbo aımaǵynda ornalasqan. Sondaı-aq ELN on jyl burynǵy beıbit kelisimge qosylmaǵan, taratylǵan Kolýmbıa revolúsıalyq qarýly kúshteriniń (FARC) búlikshil toptaryn panalaıdy.
Eki top ta Venesýelamen shekaralas, Kolýmbıanyń negizgi koka óndiretin aımaqtarynyń biri bolyp tabylatyn strategıalyq mańyzdy aımaqty baqylaýǵa umtylýda.
Tamyz aıynda Kýkýtadaǵy polısıa beketiniń janynda bolǵan jarylysta 11 polıseı jaralanyp, bir polısıa ıti qaza tapqan edi. Bılik bul shabýyldy da ELN-ge júktegen. Osy aptanyń basynda Kolýmbıanyń soltústik-shyǵysyndaǵy polısıa beketiniń janynda bolǵan kólik bombasynyń jarylysynan keminde bir azamat qaza taýyp, 11 adam jaralandy.