Kolýmbıanyń ońtústigindegi lısenzıasyz altyn kenishinde bolǵan kóshkin saldarynan keminde 13 jumysshy qaza taýyp, taǵy jeti adam jaraqat aldy. Bul týraly jergilikti bılik habarlady.
Kýágerlerdiń aıtýynsha, sársenbi kúni tústen keıin ashyq ádispen jumys isteıtin kenishte jarylys bolǵan, sál keıin tómende jumys istep jatqan adamdar kóshkin astynda qalǵan.
Qutqarýshylar men jergilikti turǵyndar ekskavatorlardyń kómegimen máıitterdi qum astynan shyǵardy. Qaza tapqandardyń tórteýi bir úndis otbasynyń músheleri eken.
Turǵyndardyń aıtýynsha, Narıno provınsıasynyń ońtústigindegi Polıkarpa mańyndaǵy kenishte ádette 50-ge jýyq adam, negizinen Kılásınga úndis tobynyń ókilderi jumys istegen.
Kolýmbıada, ásirese resmı baqylaýsyz asyl metaldar óndiriletin lısenzıasyz kenishterde qaıǵyly oqıǵalar sırek emes. Kolýmbıada 200 myńnan 400 myńǵa deıin adam qolónershilik ádispen ken óndirýmen aınalysady dep esepteledi, kóptegen otbasylar tapqan asyl metaldar men tastardy satýdan túsken tabysqa táýeldi.