Bıylǵy jyldyń alǵashqy alty aıynda Almaty oblysynyń oıyn bıznesi memlekettik búdjetke 25 mıllıard teńge salyq tóledi, onyń 10,6 mıllıard teńgesi oblystyq qazynaǵa tústi, dep habarlaıdy infohub.kz saıty.
Jalpy sońǵy eki jarym jylda sala 184,7 mıllıard teńge salyq aýdardy, onyń 53,8 mıllıard teńgesi oblys búdjetine jiberildi. Qazirgi ýaqytta Qonaev qalasynda oıyn bıznesiniń 21 nysany jumys isteıdi: 5 kazıno, 13 býkmekerlik keńse jáne 3 oıyn avtomattary zaly. Salada 2,5 myńǵa jýyq adam jumys isteıdi.
Oıyn bıznesi týrızmniń damýyna da yqpal etedi. Týrızm basqarmasynyń dereginshe, kazıno kelýshileriniń shamamen 20 paıyzy — shetel azamattary. «Qonaev qalasyna kelgen árbir týrıs qonaqúılerge ornalasyp, qoǵamdyq tamaqtaný oryndaryna barady, kólik, saýda jáne basqa da qyzmetterdi paıdalanady. Bul óz kezeginde shaǵyn jáne orta bıznestiń damýyna, jańa jumys oryndarynyń ashylýyna jáne jergilikti ekonomıkanyń jandanýyna yqpal etedi. Sondyqtan týrısik aǵynnyń ulǵaıýy aımaqtaǵy qyzmet kórsetý salasynyń damýyna oń áser etedi», — dedi týrızm basqarmasynyń basshysy Qýanyshbek Mırambekuly.
Qoldanystaǵy «Oıyn bıznesi týraly» zań aıasynda Talǵar aýdanynda tek shetel azamattaryna arnalǵan jańa oıyn aımaǵyn qurý josparlanýda. Bul bastama qoǵamdyq keńestiń oń qorytyndysyn aldy. Jobanyń Talǵar aýdanyna ornalasýy onyń joǵary týrısik áleýetimen túsindiriledi: aýdan Almaty jáne halyqaralyq áýejaıǵa jaqyn ornalasqan, sonymen qatar taý, saýyqtyrý jáne rekreasıalyq týrızmniń damyǵan ınfraqurylymy bar.
«Talǵar aýdany aımaqtyń eń damyǵan týrısik baǵyttarynyń biri. Munda «Aqbulaq» sporttyq-saýyqtyrý kesheni, «Oi-Qaragai» taý shańǵysy kýrorty, Aquaasia Resort kýrorttyq kesheni jáne Tal Resort demalys aımaǵy ornalasqan. Sondyqtan jańa oıyn aımaǵy aımaqtyń týrısik ekojúıesiniń bóligi retinde qarastyrylady. Bul týrısik qyzmetterdiń aýqymyn keńeıtýge jáne servıstik ınfraqurylymdy damytýǵa qosymsha múmkindikter jasaıdy», — dep atap ótti Qýanyshbek Mırambekuly.
Ákimdikte jobanyń iske asyrylýy qonaqúı bıznesiniń, qoǵamdyq tamaqtaný salasynyń, kólik, saýda jáne basqa da qyzmetterdiń damýyna serpin beretinin, jańa jumys oryndaryn quratynyn, ınvestısıalar tartatynyn jáne búdjettiń kiris bóligin arttyratynyn qosty.