Kóńil qusy quıqyljyr shartarapqa,
Adam oıy túrlenip aýǵan shaqta.
Salǵan án — kóleńkesi sol kóńildiń,
Taktysyna bılesin ol qulaqqa.

Shyrqap, qalqyp, sorǵalap, tamyljıdy,
Júrek terbep, oıatar basta mıdy.
Bul dúnıeniń lázzáti bári sonda,
Oısyz qulaq ala almas ondaı syıdy.

¥ıyqtap jatqan júrekti án oıatar,
Únniń tátti oralǵan máni oıatar.
Keıi zaýyq, keıi muń, dertin qozǵap,
Jas balasha kóńildi jaqsy ýatar.

Adam az muny bilip án salarlyq,
Tyńdaýshy da az ol ánnen báhra alarlyq.
Muńmen shyqqan, oralǵan tátti kúıge
Jyly júrek qaıda bar qozǵalarlyq?

Kóbinese án basy keledi ashshy,
"Kel tyńda!" dep ózgege bolar basshy.
Kerim tolǵap, taýysar qańǵyr-kúńgir
Sol jerine oıyńmen aralasshy.

Ánniń de estisi bar, eseri bar,
Tyńdaýshynyń qulaǵyn keseri bar.
Aqyldynyń sózindeı oıly kúıdi
Tyńdaǵanda, kóńildiń óseri bar.

Bilimdiden aıaman sózdiń maıyn,
Alty óleńmen bildirdim ánniń jaıyn.
Ezdiń basy qańǵyrsyn, erdiń kóńili
Jańǵyrsyn dep oıladym aıtqan saıyn.
Kókireginde oty bar oıly adamǵa
Bul sózimniń sýreti turar daıyn.

---