Japonıa ǵalymdary kóshelerdi kógaldandyrý uıqy sapasyn jaqsartýy múmkin ekenin anyqtady. Zertteý kórsetkendeı, jaıly qalalyq orta megapolısterde turatyndardyń demalysyna oń áser etedi, dep habarlaıdy infohub.kz saıty.
Mamandar Google Street View qyzmetindegi Tokıo kósheleriniń 200 myńnan astam sýretin jasandy ıntellekt kómegimen taldady. Alynǵan derekterdi qalada turatyn 40 pen 59 jas aralyǵyndaǵy 1089 jumys isteıtin turǵynnyń uıqysy týraly aqparatpen salystyrdy.
Kógaldandyrylǵan aýdandarda turatyn adamdar orta eseppen uzaǵyraq uıyqtaıtyny belgili boldy. Sonymen qatar, kósheleri aǵashtarmen nemese ǵımarattarmen «kómkerilgen» aýdandarda turatyndarda uıqy uzaqtyǵy artyp, uıqysyzdyq belgileri azaıǵan.
Bul baılanystyń bir bóligi aýdandy sýbektıvti qabyldaýmen túsindiriledi. Turǵyndar kógaldy jáne jabyq kóshelerdi qaýipsiz ári jandy dep sanaıdy, al bul sezimder, avtorlardyń pikirinshe, uıqy sapasyna oń áser etedi.
Taǵy bir nátıje kútpegen boldy. Jaıaý júrginshilerge yńǵaıly kóshe jospary bar aýdandar uıqy uzaqtyǵynyń qysqarýymen baılanysty boldy. Zertteýshiler bul keıbir turǵyndardyń mundaı aýdandardy qaýipsiz dep sanamaýynan bolýy múmkin dep boljaıdy.
Alynǵan derekter sáýletshiler men bılikke qalalyq ortanyń adam densaýlyǵyna áserin eskere otyryp, ómir súrýge qolaıly aýdandardy jobalaýda paıdaly bolýy múmkin.
Zertteý qalalyq orta erekshelikteri men uıqy arasyndaǵy yqtımal baılanysty ǵana anyqtady. Ol jasyl kósheler uıqy sapasyn tikeleı jaqsartady nemese nasharlatady degendi dáleldemeıdi.