Amerıkalyq zertteýshiler kózdiń qasań qabyǵyn elektr toǵymen ózgertýdiń qansyz tásilin usyndy, — dep jazady ScienceDaily portaly, habarlaıdy infohub.kz saıty.
Jańa tehnologıa elektromehanıkalyq pishin ózgertý (EMR) dep ataldy. Avtorlardyń oıynsha, ol dástúrli LASIK lazerlik túzetýine qaraǵanda qarapaıym ári arzan balama bola alady.
Ǵalymdar qasań qabyq tinderin lazermen kesip alýdyń ornyna álsiz elektr toǵyn paıdalanady. Elektr ımpúlsi kóz tinderindegi pH deńgeıin biraz ýaqytqa ózgertip, qasań qabyqtyń qattylyǵyna jaýap beretin negizgi aqýyz — kollagendi jumsartady. Osy sátte tinder serpimdi bolyp, kerek pishindi ońaı qabyldaıdy, al pH deńgeıi qalpyna kelgen soń qasań qabyqtyń qattylyǵy qaıta oralady.
Tájirıbe barysynda zertteýshiler qoıandardyń kózine elektrod ári ıilý pishini qyzmetin atqarǵan platına lınzalar kıgizdi. Álsiz tok áserinen qasań qabyq nebári bir mınýtta pishinin ózgertip, barlyq 10 synaq úlgisinde de jaqynnan kórý máselesin sátti ótedi. Sonymen qatar pH deńgeıi joǵary dáldikpen baqylanǵandyqtan, kóz jasýshalary zardap shekpedi.
Ádis zerthanada tamasha nátıje kórsetti, biraq ony adamdarǵa qoldanýǵa áli kóp ýaqyt kerek. Ǵalymdar tehnologıanyń qaýipsizdigine kóz jetkizý jáne túzetýdiń alynǵan áseri qansha ýaqyt saqtalatynyn bilý úshin tiri janýarlarda uzaq synaqtar júrgizýi tıis.