Qostanaı turǵyny ǵımarattyń tóbesinen qulaǵan muzdan kóliginiń zaqymdanýy úshin sot arqyly ótemaqy aldy. Kólik ıesine 2 mıllıon teńge óndirildi, dep habarlaıdy infohub.kz.
Qostanaı oblysy sottarynyń resmı Telegram-arnasynda habarlanǵandaı, Qostanaı qalalyq soty ǵımarattyń tóbesinen muzdyń qulaýynan keltirilgen materıaldyq shyǵyndy óndirý týraly talap aryz boıynsha azamattyq isti qarady.
Sot anyqtaǵandaı, 2026 jyldyń naýryzynda Qostanaıdaǵy Abaı dańǵyly boıyndaǵy ǵımarattyń tóbesinen talapkerdiń turaqta turǵan kóligine qar-muz massasy qulaǵan, saldarynan kólik mehanıkalyq zaqym alǵan. Shyǵyn mólsheri táýelsiz baǵalaý qorytyndylarymen rastalǵan: qalpyna keltirý jóndeý quny 1,8 mıllıon teńgeden asqan, al taýar qunynyń joǵalýy 180 myń teńgeni quraǵan.
Jaýapker, jeke kásipker, qar men muzdyń túsýi múmkin ekendigi týraly eskertý habarlandyrýlarynyń bolǵanyn alǵa tartyp, talapqa qarsylyq bildirgen. Alaıda sot usynylǵan fotosýretterden olardyń jasalǵan jáne ornalastyrylǵan ýaqytyn anyqtaý múmkin emes ekenin anyqtady. Oqıǵadan keıin birden túsirilgen beınejazba eskertý belgileri men habarlandyrýlardyń joqtyǵyn rastady.
İsti qaraý barysynda sot Azamattyq kodekstiń 9 jáne 917-baptaryn, sondaı-aq Qostanaı oblysynyń qalalary men eldi mekenderiniń aýmaqtaryn abattandyrý qaǵıdalaryn basshylyqqa aldy. Osy qaǵıdalarǵa sáıkes, shatyrdy qar men muzdan ýaqtyly tazartý jáne azamattardyń jáne olardyń múlkiniń qaýipsizdigin qamtamasyz etý mindeti ǵımarattyń ıesine júkteledi.
Sot jaýapkerdiń zıan keltirýdi boldyrmaý úshin barlyq qajetti sharalardy qabyldamaǵany týraly qorytyndyǵa keldi jáne talapty qanaǵattandyrdy. Sot sheshimimen jeke kásipkerden talapkerdiń paıdasyna 2 mıllıon teńge kóleminde materıaldyq shyǵyn óndirildi. Sot sheshimi zańdy kúshine engen joq.