Qostanaı oblysynda 28 jastaǵy jergilikti turǵynǵa qatysty úkim shyqty. Ol tórt jyl boıy Binance platformasynda zańsyz krıptovalúta saýdasymen aınalysqan. Sot ony eki jylǵa bas bostandyǵynan aıyryp, múlkin tárkiledi, dep habarlaıdy infohub.kz.
2020 jyldan 2024 jylǵa deıin er adam lısenzıasyz Binance-tiń P2P bólimi arqyly krıptovalúta satyp alyp, satqan. Operasıalar úshin ol óz atyna, týystary men basqa adamdarǵa rásimdelgen bank shottaryn paıdalanǵan. Tapqan aqshasyn bankterdegi depozıtterge jasyrǵan.
«Zańsyz tabys 1,9 mlrd teńgeden asty. Ol aqshany qylmystyq shyǵý tegin jasyrý úshin bank depozıtterine ornalastyrǵan», — delingen sot materıaldarynda.
Prokýratýra talap qoıýy boıynsha sot sottalǵannan 1,9 mlrd teńgeni memleket kirisine óndirip aldy. Sonymen qatar, 13,4 mln teńge qolma-qol aqsha, eki jeńil kólik jáne 7,9 myń dollar kólemindegi krıptovalúta tárkilendi. Oǵan jeti jyl boıy maınıngpen jáne sıfrlyq aktıvtermen kez kelgen operasıalarmen aınalysýǵa tyıym salyndy.
Buǵan deıin Qazaqstan alǵash ret memlekettik krıptorezervti maınıng esebinen tolyqtyrýdy josparlap otyrǵany habarlanǵan bolatyn. İri kompanıalarǵa on jylǵa bekitilgen tarıf boıynsha elektr energıasy usynylady, onyń ornyna olar óndirilgen krıptovalútanyń 10 paıyzyn memleketke tegin beredi. Strategıalyq maınıng úshin alǵashqy elektr energıasyn jetkizýshi Ekibastuz GRES-1 bolady.