Qostanaı qalalyq soty ǵımarattyń shatyrynan qar-muz massasy qulap, avtokóligi zaqymdalǵan ıesiniń talabyn qanaǵattandyrdy. Sot jeke kásipkerden 2 mln teńge ótemaqy óndirip alý týraly sheshim shyǵardy, dep habarlaıdy infohub.kz.
Sotta anyqtalǵandaı, oqıǵa 2026 jyldyń naýryz aıynda Qostanaıdaǵy Abaı dańǵylynda bolǵan. Talapkerdiń turaqta turǵan kóligine qar-muz massasy qulap, mehanıkalyq zaqym keltirgen.
Zaqym kólemi táýelsiz baǵalaýmen rastaldy. Sarapshylardyń qorytyndysy boıynsha, qalpyna keltirý jóndeý quny 1,8 mln teńgeden asqan, al kóliktiń taýarlyq qunynyń joǵalýy 180 myń teńgeni quraǵan.
Jaýapker ǵımarattyń janyna qar men muzdyń túsýi múmkin ekendigi týraly eskertý habarlandyrýlary ornalastyrylǵanyn aıtyp, talapty qanaǵattandyrmaýdy suraǵan. Alaıda sot bul dáleldi senimsiz dep tapty: usynylǵan sýretter túsirilgen ýaqyt pen eskertýlerdiń ornalastyrylǵan ýaqytyn anyqtaýǵa múmkindik bermegen. Sonymen qatar, oqıǵadan keıin birden jasalǵan beınejazba muz túsken kezde eshqandaı belgiler men habarlandyrýlardyń bolmaǵanyn kórsetken.
Sheshim shyǵarý kezinde sot Qazaqstan Respýblıkasy Azamattyq kodeksiniń 9 jáne 917-baptaryn, sondaı-aq Qostanaı oblysynyń qalalary men eldi mekenderiniń aýmaqtaryn abattandyrý qaǵıdalaryn basshylyqqa alǵan. Bul normalar ǵımarat ıesine shatyrdy qar men muzdan ýaqtyly tazartýdy jáne azamattar men olardyń múlkiniń qaýipsizdigin qamtamasyz etýdi mindetteıdi.
Sot jaýapkerdiń zıannyń aldyn alý úshin barlyq qajetti sharalardy qoldanbaǵany týraly qorytyndyǵa kelip, talapty tolyq kólemde qanaǵattandyrdy. Jeke kásipkerden 2 mln teńge kóleminde materıaldyq shyǵyn óndirildi. Qazirgi ýaqytta sheshim zańdy kúshine engen joq.