Qostanaı oblysy Uzynkól aýdanynyń ákimi men aýdandyq jer qatynastary bólimine qarsy sot daýynda sharýa qojalyǵy jeńiske jetti. Bul týraly infohub.kz saıty habarlaıdy.
Qostanaı oblysy sottarynyń resmı Telegram-arnasynda habarlaǵandaı, Mamandandyrylǵan aýdanaralyq ákimshilik sot (MAÁS) sharýa qojalyǵynyń Uzynkól aýdany ákimi men aýdandyq jer qatynastary bólimine qarsy talap aryzyn qarady. Talapker konkýrs qorytyndylaryn zańsyz dep tanýdy jáne kúshin joıýdy talap etti.
İs materıaldarynan kóringendeı, 2026 jylǵy mamyrda aýdandyq gazette sharýa nemese fermer qojalyǵyn júrgizý jáne aýyl sharýashylyǵy ónimin óndirý úshin ýaqytsha óteýli jer paıdalaný (jalǵa alý) quqyǵyna konkýrs ótkizý týraly habarlandyrý jarıalanǵan. Konkýrsqa bes ótinim túsken.
2026 jylǵy 1 maýsymda jer komısıasy otyrys ótkizip, nátıjesinde bir ótinish berýshi jeńimpaz dep tanyldy. Alaıda sharýa qojalyǵy bul sheshimmen kelispeı, konkýrs nátıjelerin jáne hattamalyq sheshimnen týyndaıtyn barlyq quqyqtyq saldardy joıýdy talap etip, sotqa júgindi.
Sot talqylaýy barysynda jer komısıasynyń otyrysy zańda belgilengen komısıa quramynyń buzylýyna baılanysty arnaıy kvorýmsyz ótkeni anyqtaldy. Sonymen qatar, Jer kodeksiniń 43-1-babynyń 14-tarmaǵyn buza otyryp, konkýrs jeńimpazyna negizsiz qosymsha 10 bal berilgen.
Sondaı-aq, komısıanyń hattamalyq sheshiminde daýly jer ýchaskesi boıynsha jeńimpazdy anyqtaýǵa negiz bolǵan dálelder men ólshemsharttar týraly mindetti málimetter joq ekeni belgili boldy. Qujatta basqa qatysýshynyń jeńiske jetýi týraly bastapqy sheshim ózgertilgen qaıta daýys berý faktisi kórsetilmegen.
Anyqtalǵan barlyq buzýshylyqtardy eskere otyryp, sot ákimshilik talapty tolyq kólemde qanaǵattandyrý týraly sheshim qabyldady. Aıta ketý kerek, sheshim áli zańdy kúshine engen joq.